Y'a bein, bein longtemps... y'a dans les 65 millions d'années... la tèrre trembliait. Y'avait des montangnes dé feu, des runguements souôtèrrains, des éruptions et d's explôsions, et la mé bouoillait. Dgieu mèrcie qué jé n'têmes pon là à ch't' êpoque - autrément j'éthêmes peu dithe s'lon les patholes du sieaume 46: J'n'éthons don pon d'peux quand la tèrre est transformée, nitout quand les monts tchaient dans l'tchoeu des mers. I' hueûlent, l's ieaux, et sont troubliées. Les monts châquent dans lus ordgi. Et ch'est bein vrai qu'es monts châtchaient, y'a dans les 65 millions d'années. Et i' s'adonnit qu'la tèrre s'ouvrit et eune înmense mathe dé pièrre fondue dé d'dans les bouoyaux d'la plianète montit et înnondit pus qu'eune chentaine dé kilomètres dé tèrrain.
Coumme chutte mathée d'litchide volcannique settlait et s'èrfraidgait, la pièrre c'menchait à cratchi et à former des cristaux, et quand la nouvelle pièrre tchi couvrait l'tèrrain r'fut solide, nou-s'éthait veu eune forêt d'êtotchets à siêx-carres jusqu'à l'horizon.
Avaû les siècl'yes et les millénaithes, la mé montait, les louêmes emportait eune partie d'chutte bouaîs'sie cristallinne, des nouvieaux monts et des falaises couvraient eune partie du rotchi - et tout ch'qu'i restait pouor les gens à vaie 'tait raique deux-trais p'tit buts d'chutte mathée catastrophique dé pièrre fondue d'y'a si longtemps.
Tout coumme, mé, j'vîsitis chutte mèrvelle du monde natuthelle ch't Êté quand j'tais à pédaler en Irlande du Nord duthant mes vacanches. Ch'est en tchi, lé Pont ès Giants sus la côte du Comté d'Antrim est vraînment spectatchulaithe.
J'avais 'té gêné si lé Pont ès Giants s'sait trop conmèrcialîsé, mais nou-fait car lé National Trust a clièrgi tout l'bataclian touristique tchi soulait enhèrméler les pièrres du Pont. Jusqu' ès années 1960s, quand lé National Trust atchit l'site, y'avait des gril'yes et des bârriéthes à l'entou du Pont et même eune maîson du gardgien au pid des falaises. Heutheusement, achteu lé centre ès vîsiteurs est driéthe la préchaine falaise et y'a un c'mîn tchi d'vale et touônne la carre pouor aller au Pont (y'a eune minibeusse tchi fait eune touônné rédguliéthe entre lé centre ès vîsiteurs et l'Pont pouor les cheins tchi n'veulent pon y'aller à pid).
J'n'avais pon réalîsé qu'lé Pont ès Giants est dans un amphithiâtre natuthel dé falaises dé tchi les rotchièrs avaient 'té stchulptés par la forche d'la natuthe. V'la tchi m'fit penser au Pinnacl'ye ès Landes - mais bein pus împressionnant. À preunmié veue, lé Pont ès Giants sembl'ye bein p'tit et quâsiment un mio d'sappouaintant par compathaîson auve la grandeu des falaises, mais quand nou c'menche à grîmper par les colonnes dé néthe pièrre épis aller pus liain jusqu'au bord dé l'ieau, ch'est coumme nou-s'a trouvé eune difféthente plianète - nou-s'éthait dit la susfache d'la leune. Et ch'est dû d'craithe qué toutes ches colonnes à siêx carres fûtent faites par la natuthe. Les gens du temps pâssé criyaient qué ch'tait l'travas dé giants, et quand nou sait qu'en l'île dé Staffa en Êcosse, la Cave à Fingal auve ses colonnes est eune partie d'l'aut' but dé chutte mathée d'pièrre fondue préhistorique d'y'a eune souaixantaine dé millions d'années, nou-s'a quâsiment ma la tête à l'comprendre. Auprès tout ch'est pus aîsi d'penser qu'des giants avaient êprouver d'bâti un pont d'pavés entre l'Êcosse et l'Irlande.
La chose en est, bouonnes gens, s'ou voulez vîsiter l'Pont ès Giants en Irlande du Nord, i' faut y'aller bein tôt l'matîn, car les fliotchets d'touristes tch'y veinnent duthant la journée et tchi couvrent lé Pont coumme si ch'tait eune freunmionniéthe... assa, i' sont bein piéthes qu'un giant ou deux.
Mèrcie bein des fais pouor m'aver êcouté, et à bétôt.
Viyiz étout: