Quand nou liet entouor l'ancienne civilisâtion Grecque nou-s-est gentiment êbahis dé penser comme tchi qu' tout ch'la s'pâssait y'a si longtemps. Et ch'la s'applyique, sans doute, à toute aut' civilisâtion d'aut'fais tch'a dispathu et tchi n'a laîssi qu' des traces et des r'liques comme êvidence. Mais i' faut bein seux aller vaie pouor sé-même chein tchi reste comme monuments à ches anciens peupl'yes, à ches races dé gens du temps pâssé. Car ch'est là qué nou peut réaliser atout ses ièrs touos grands ouvèrts et comprendre un mio dé chein qu' ch'était y'a si longtemps.
I' faut don aller faithe un viage en Grêce pouor étre êmèrvilyis dé la civilisâtion Grecque dé y'a deux mille chînq chents ans et pus. Eh bein, ch'est chein qu'eune douzaine dé gens d'Jèrri (comme d'aut's l'ont fait devant ieux, bein seux) fîdrent au s'tembre pâssé pouor eune tchînzaine dé jours. Un viage avait 'té arrangi pouor la Tèrre Sainte, pouor sorti à la mié-octobre, mais les circonstances en voulîdrent autrément. La dgèrre êcliatit entre Juis et Arabes; ch'est en tchi ch'la fut dêmîns et eune touônnée en Grêce fut organnisée à la pliaiche. À la fîn des tchînze jours tous étaient d'eunanînme qué l'affaithe avait 'té un grand succès et en avait bein valu la peine.
Nou sortit, don, dé Jèrri, lé 15 d'octobre et pus tard, dé Londres, arrivant eune affaithe dé quatre heuthes auprès à Thessaloniki (Salonique) dans l'nord dé la Grêce. Restant à l'hôtel "El Greco" pouor la preunmié s'maine, nou-s-allait châque jour visiter tchique pliaiche d'importance, încliu chein tchi vaut la peine dé vaie dans la cité. Un jour nou fut vaie Pella, l'ancienne capitale dé la Macédoine, où'est qu'Alexandre (Lé Grand) fut né, et les fanmeûthes et mangnifiques vielles mosaïques, et pis étout Veria (ou Beria) où'est qu' St. Paul avait resté et prêchi y'a ilo beintôt deux mille ans. Un aut' jour ch' fut eune excursion à la ville dé Kavalla, anciennement appelée Neopolis, et à Philippi et Amphipolis, viyant en c'mîn la Via Egnatia - la grand'route Romaine d'aut'fais tchi m'nait ès provînces dé l'Asie, la prison d'St. Paul, lé thiâtre Romain, et la pliaiche lé long d'la riviéthe où'est St. Paul avait amors dé prêchi, et cétéra, et cétéra. Quand nou 'tait hors pouor lé jour nou-s-arrêtait à tchique hôtel pouor mangi. Lé dînmanche nou vit un bâptême (à la manniéthe Grecque orthodoxe, bein seux), bein întérêssant, et pis pus tard dans la journée nou rembèrtchit dans un avion pouor Athènes. Là, tout l'parti fut mîns à l'hôtel "Hellinis" pouor eune aut' sémaine.
À Athènes nou fit des touônnées dans la cité et nou fut vaie les prîncipaux musées et pis, bein seux, l'Acropole, lé célèbre Parthénon, et cétéra, lé port du Pirée et bein aut's choses.
Un jour, visitant Daphni en route, lé parti fut jusqu'à Corînthe, vaie toutes ses mèrveil'yes. Et pis étout, eune longue excursion jusqu'à Delphes (ou Delphi), au bas du Mont Parnasse, vaie toutes ches ruinnes si mèrveilleûthes au pid et dans les montangnes. Nou fut étout, à difféthents temps, à Levadia, Panorama et bein d'aut's difféthentes pliaiches tchi valent tant la peine dé vaie.
Et pis par eune belle journée tous fûdrent sus un mangnifique navithe, tout neu, dans l'êst d'la Méditerranée (la "Mer Égée") ès îles Aegina, Hydra et Poros.
À la fin d'la s'maine nou r'volit à Londres et en Jèrri, ayant ieu eune supèrbe vacance et ayant veu tant d'choses mèrveilleûthes à n'en pas r'vénîn.
Nou n'tait janmais sans dgides, et v'là tchi nouos faîthait l'affaithe bein pus întérêssante, sans doute.
En êffet, lé viage fut des pus fascinnants et înstructifs, et nou s'en r'vînt atout eune bein miyeuthe idée dé chein qu' l'ancienne civilisâtion Grecque avait 'té y'a si longtemps, à tel point, quâsi, qué nou sé d'mand'dait bein tchiquefais si ch'est qu' nou-s-a réellement fait tant d'progrès, comme j'aimons bein à l'penser, dépis ches temps-là!
Fraînque Le Maistre
Viyiz étout: