...J'mîns man huilet et cache en route. I' n'tchiyait pon bein dû et la route siévait la côte paîsibliément assez. Dans d's êcârreuses par la côte y'avait des êcritchieaux pouor explyitchi la natuthe du lough. Lé ciel 'tait gris, y'avait eune brise et sus l'ieau y'avait des seurfeurs à vaile.
J'arrivis à Grey Abbey mais l'abbaye 'tait freunmée (pouor des "raîsons d'comportement anti-social") et j'prîns des photos dans l'vièr chînm'tchiéthe. Pus liain y'a la grande maîson dé Mount Stewart. J'avais fait d'si bouôn progrès par lé c'mîn qu'j'arrivis d'vant méjeu quand l'bâtisse fut ouèrt. J'acatis un titchet pouor lé gardîn et jé m'pronm'nis. Y'a des statues et stchulptuthes întérêssantes dans les gardîn et y'a des dodos tchi sont ofûches l's originnaux des cheins d'la Mênag'gie d'Jèrri. J'm'en fus vèrs Newtownards. D'chu bord d'la mathe nou vait bein cliaithement la Tou d'Scrabo haute sus l'mont d'l'aut' bord d'la mathe. I' n'y'a rein d'întéthêt à Newtownards mais la ville est raîque à tchiques kilomètres dé Belfast...
Geraint Jennings
Viyiz étout: