Mardi l'15 d'Août 2006
I' broussait quand jé m'rêvilyis - pus tard qu'j'éthais espéthé - et i' sembliait qu'lé temps 'tait pouor la plyie auve p't-êt' des clièrgeons à ch't' arlévée. Auprès l'dêjeuner j'mîns man huilet et cache en route. I' fallait r'pâsser les ponts épis aller vèrs l'Nord pouor Coleraine. Maûgré la plyie la route n'tait pon mauvaise - nou siévait la riviéthe douochement amont et ava. En s'appréchant d'Coleraine y'avait des maîsons et des dêv'loppements et acouo des maîsons. Ch'n'est pon ravissant s'il' ont un tas d'Polonnais ichîn - pouor eune fais i' n'y'a pon assez d'bâtisseurs Irlandais! Au bord d'la route, y'a eune sente lé travèrs des bouais tchi mène au Fort Mont Sandé (Mountsandel). Ch'est des câtchieaux hauts pliaichis sus la riviéthe - s'lon l'êcritchieau ch'est Anglio-Nouormand mais jé m'démande si ch'n'est pon d'l'Âge dé Fé pouor c'menchi. I' broussait et nou n'viyait dgéthe la riviéthe à cause des bouais l'entou - mais nou viyait cliaithement B&Q et d'aut's grands stôrres d'la ville.
Y'a bein des c'mîns à bike à Coleraine - sans doute l'Unnivèrsité encouothage l'ûsage des bikes auve touos l's êtudgiants. J'arrivis au pont du centre ville. Ch'est là qu'la touônnée suggéthée c'menche. J'éthais voulu vaie l'templ'ye dé Mussenden - mais i' n'valait pon la peine d'y aller par un temps d'ité. Ayant êpié l'Hôtel dé ville dans la pièche du mitan - j'y allis. Ch'est d'la belle architectuthe du 18e siècl'ye, m'est avis. À l'entou les rues pavées 'taient affaithées. J'fis sèrvi eune machinne à sou. Du centre ville dé Coleraine, y'a des c'mîns à bike toute la vaie à Portstewart; les deux villes touristiques dé Portstewart et Portrush sont des vaîthîns ouaithe qué l'preunmyi sait en Comté Londonderry et l'aut' en comté Antrim. Nou peut pédaler par la prom'nade et la veue sus la mé es'sait mangnifique sans doute s'i' n'tchait pon d'la plyie. Portrush est pustôt "embraîche-mé quédaine" - j'y trouvis eune boutique et j'acatis du lait et d'la bouaîsson gazeuse.
En pâssant en amont acouo un tèrrain d'golf, i' tchiyait acouo d'la plyie et j'avais l's esprits bas - mais la veue sus la côte 'tait supèrbe. Nou vait les rotchièrs Skerries en mé et j'pensis si l'Êtchèrviéthe es'sait liée. Viyant qu'l'originne "an sgier" "l's îles" est Gaélique - probabliément nânnîn, mais la préchaine fais qu'nou pâle d's originnes Celtiques, j'éthais ofûche dé tchi à dithe.
Les falaises d'la côte ichîn sont rotcheuses et stchulptées auve d's êtas et d's arches. J'arrivis à eune êcarreûse à piquenitchi auve des veues mangnifiques - lé Pont ès Giants est driéthe iun des nez préchains. Lé temps s'tait clièrgi un mio achteu.
À Dunluce Castle, lé châté est jutchi sus un êta. en êffet y'a l'châté dé d'dans sus l'êta, épis l'châté dé d'houors - l's offices, êtabl'yes et tout chenn - et un p'tit pont entré les deux.
En d'valant au pont, y'a l'souô-dîthant "entonneux" tchi rassembliéthait tout dans eune carre à l'entrée du pont. Ch'es'sait dû d'lanchi eune attaque à pid vèrs l'pont. et acouo, si nou m'nichait d'attatchi l'châté, nou rempliéthait l'entonneux d'bestchias. V'là tchi blioqu'thait l'entrée du pont, si les vaques 'taient mortes ou en vie. L's attatchant lus enhèrmél'laient d'vaques. Mais ché n'tait pon l's attatchants tchi dêtruîsîtent lé châté - eune niet d'tempête au 17e siècl'ye, la muthâle dé driéthe du châté êcrouôlit dans la mé - tchiques sèrveurs mouothîtent. La Danme r'fusit d'y d'meuther d'aut'. Mé, j'éthais r'fusé d'y d'meuther du tout. Tchi mînséthabl'ye pièche! Sustout dans la brousse et la plyie.
Mais l'temps s'clièrgit pouor l'arrivée à Bushmills. J'trouvis la pension. Madanme m'offrit eune tâssée d'thée - et j'décidis d'aller au Pont ès Giants à ces sé si'en cas qu'i' tchai d'la plyie d'main.
La route dé Bushmills au Pont monte et d'vale mais ch'fut aîsie (sustout sans lé bîssa!) Y'avait du monde à la boutique du Pont - mais pas trop. J'avais 'té gêné si lé Pont 'tait trop conmèrcialîsé. mais nou-fait, car la boutique et tout chenna est à haut d'la falaise épis y'a eune sente tchi d'vale et touônne la carre au Pont - et don lé centre et l's offices n'lus vaient pon du pont.
J'n'avais pon réalîsé qu'lé Pont ès Giants est dans un amphithiâtre natuthel dé falaises - v'là tchi m'ramémouaithit du Pinnacl'ye en Jèrri. Lé temps 'tait couvèrt et i' n'y'avait pontrop d'monde et l'Pont 'tait supèrbe. En êffet y'a trais Ponts - un p'tit, lé pont du mitan épis l'grand. À l'entou nou vait sus les falaises acouo des formâtions tchuthieuses, mais ch'est lé pont auve ses colonnes tch'est chein tch'attrioque les gens - ch'est coumme eune gamme: grîmper et d'valer, aller d'un bord à l'aut' et tout l'monde auve lus caméras et téléphones à caméra.
Nou peut distîndgi les "touristes" et lus fanmil'yes tchi lus mâtent ou lus assièvent sus les hautes colonnes à tèrre, épis y'a les "penseurs" du but du pont tchi dgettent la mé, les louêmes et les pièrres en pesnant lus pensées. J'fus bein pus înspithé qu'j'éthais pensé - sustout auve un temps d'même. I' rquémenchit à brousser en montant amont les d'grés d'la falaise et la lueu s'affouaiblyit. J'rallis à Bushmills par lé c'mîn tchi va l'long du c'mîn d'fé l'travèrs des mielles (tch'est l'tèrrain d'golf). Tchiques touffets d'ortchies (malheu ès courtes braies!) mais un mangnifique quémîn.
Au centre ville dé Bushmills j'acatis des frites et j'les mangis dans l'par du bord d'la riviéthe. J'acatis du lait et du cidre dans un supèrmarchi et j'rallis à la pension. Les habits sont mouoillis mais chenna a 'té eune raide bouonne journée!
Mêcrédi l'16 d'Août 2006
Jé m'rêvilyis auve ma la tête. Mais lé solé lithait et j'attendais fête la journée. Lé dêjeuner 'tait ênorme - eune grande potée d'thée, dêjeuner Irlandais, pain rôti, acouo du pain rôti, pain à patate fricachi, pain à sode fricachi, et acouo et acouo. Y'avait un janne coupl'ye Allemand là et eune méthe et sa fil'ye dé Lisburne. La fil'ye avait 'té à viagi et à travailli 'chîn et là dans l'monde mais ou n'avait janmais vîsité siez sé. Sa méthe don (tch'avait vîsité Jèrri y'a bein d's années) avait prîns l'opporteunité d'mouontrer à sa fil'ye lé Pont et tout chenna. J'caqu'tînmes épis j'm'en fus. J'tais d'avis d'èrvaie l'Pont au solé épis ofûche èrvénîn pouor la distil'lie d'whiskey d'Bushmills. Mais s'i' fallait mantchi la distil'lie, n'y'éthait pon d'souain.
J'èrprîns lé c'mîn par lé c'mîn d'fé - pas si aîsi d'êcapper ès ortchies auve lé bîssa. Y'avait mains d'monde lé matîn au Pont - pustôt des penseurs (coumme mé!) Lé solé lithait sus lé pont et sus les buts des falaises - l'amphithiâtre 'tait ombragi. La mé 'tait rude - du r'sîn crémeux fliattait les rotchièrs - et la mé 'tait bliue et bouoillait par sus les greunes et les d'mies. Des longues louêmes litchaient les colonnes à siêx faches.
J'èrgardais, j'prîns des photos, j'fis des portraits, j'contempliais. Enfîn, j'èrmontis la falaise et rallis à la bike. Épis en route par la côte en faîthant quart pouor Balleycastle.
Geraint Jennings
2006
Viyiz étout: