Quand nou s'aranse à blyîntchi l'th avièrs d'à ch't lieu tchi s'en vont bein vite quémenchi lus êcolage, touos fîns frais neufs, comme tchi pouôrrait dithe, atout lus neuves hardes acatées esprès, s'en aller touos jouaiyeurs (non, pas tous, bein seux!), eh bein, nou n'peut songi à lus av'nîn, à tch'est tchi l'th attend les préchains jours et nou n'peut sinon s'en attrister un mio, ou hardi, s'lon comme tchi qu' chenn'na vouos prend. Car dans l'couothant d'ilo eune doûthaine d'années, dithons, nouot' nouvelle sociêté et l' înstruction modèrne étha fait d'la grand' partie d'ches chièrs marmots et chérubîns en toute innocence eune race anglieûthe dé jaunes mistenfliûtes auve trop d'connaîssance ou d"'êducâtion", mais sans nul bouôn sens. Dans chu p'tit d'temps-là, d'eune doûthaine d'années, il' éthont apprîns toutes les chôthes viles, et sales et bâsses dé la vie, souvent même par expéthience! I' saithont bein seux touos les mauvais d'vis à faithe sèrvi au béthoin, et tout criabliément éthont dêjà eune bouonne accointance auve d'aut's aspects èrpugnants d'la vie modèrne du temps-là. Ch'est en tchi, nou n'peut sinon craindre lus entrée dans la vie d'adultes, car combein d' ches'th-là survivront sains et saufs, d'esprit sustout?
Tout au pus, i' s'trouv'thont sus l'pas d'l'âge dé la vie empouongnant eune fielle dé papi, un diplôme ou un dégré, témouongnant lus vaillantîthe dans eune liste împressionnante dé sujets hardi împôthants. Mais, i' n'connaîtront bein p'tit, ou même fistuthe, quant à la vraie vie à m'suthe qué filent les précieûthes années formatives, à mains, sans doute, qué lus gens n'aient 'té acouo d' ches'th-là acouothe assez avithés dé lus bailli la sorte d'solide êlevâtion et formâtion d'caractéthe dé tchi qu' les pédagogues ou êducateurs orthodoxes dé nouos jours né tcheinnent compte en tout.
Nouot' généthâtion fut bein pus chanceûthe qué la cheinne d'à ch't heu. J' n'avions pon à être engis dé tout chu lamîn tchi dêhale êtèrnellement dé chutte fichue câsse-tête dé télévîthion, et tchi nouos mange sans r'lâche ches valeurs morales tchi nouos'th avaient 'té apprînthes par nouos pathents d'eune aut' généthâtion. J'soulions otchuper nouos'th heuthes dé laîthi à grîmper amont un bouais, à bouler des cèrcl'yes avaû les rues, franches du trafi d'à ch't heu, à jouer ès marbres, au tireli, à saute-mouton, ou, par un jour dé môtuthe, nou s'habillait ofûche dans d'vielles pédgil'yes, ou vièrs hoquetons, pouor faithe la minute, ou bein étout nou s'abûthait atout les difféthentes sortes d'cartes à cigarettes, des livres d' sîmpl'yes histouaithes, ou nou prannait san pliaîthi tout sîmpliément sus chent aut's difféthentes manniéthes. Pon bein excitant, ou dithez p't-êt', mais ch'tait tout à fait satisfaîthant pouor nous et v'là tchi nouos donnait un c'menchement pouor avanchi l'înmaginnâtion dans eune bouonne et saine direction.
J' n'étchions ni n'tout badrés dé vouler dêpenser et fliaûner eune pouongnie d'sou baillis par des pathents bein trop îndulgents, et gâtés ieux-mêmes, et d'autant pus bêtes. Atout des gages d'ouvriyi d'avant-dgèrre d'eune affaithe dé trais louis la s'maine, sinon pouor les tchiques chanceurs comme i' y'a tréjous ieu, nou-th-avait la chance si nou-th-avait un deux-sou au sanm'di. Auve la chance étout, nou pouvait p't-êt' gliainer un sou ou deux en faîthant des vostes pouor les vaîthîns. Et v'là tchi nouos donnait nouos preunmiéthes idées du "commèrce", mais tchiquefais d'un danmeléchant nou fiôlait tout d'un seul train en acatant du chucre scandîn ou des dragées. Lé pus souvent, dgia, ch'éthait 'té ofûche siez Madanme Langliais, tchi gardait boutique (à St. Ou) - "à un sou d'chucrîns, s'i' vouos pliaît, dans deux pouques pouor man fréthe et mé"! Et don, ch' fut d'même pouor des'th années (duthant la preunmié dgèrre et auprès sustout). Et la preunmié connaîssance d' "înflâtion", comme v'là tchi s'dit aniet, qué j'eûssions janmais ieu, mais sans tch'il y'eûsse un'té mot acouothe înventé, sans doute, était quand nou c'menchit à aver des p'tits ballons, à Noué, qué nou prannait sait pliaîthi à soûfflier.
Aller à l'êcole, la jouêthie dans l'bel dé l'êcole, san siez-sé et pis l'églyîthe (ou la chapelle) au dînmanche - né v'là les quat' couongnets dé nouos jannes vies, à nous. Et mé v'chîn à vouos dithe qué ch'la nouos'th apprînt probabliément pus, comme base, dé chein tchi vaut la peine dans la vie qué tout l' charabia tch'i' chèrchîdrent à nouos ensîngni (et ch'est acouo bein piéthe au jour d'aniet, mouon Doue!) pouor chein tch'il' appellent dé l'êducâtion. J'avons oublié y'a longtemps la grand' partie du Latîn qu' j'êprouvînmes à apprendre, les mathématiques et toutes les scienches, mais jé nouos rappelons acouo parfaitement d'la priéthe dé la fîn d'châque jeu - "À mon lit je me couche..." - et j'pouvons acouo chanter "Jolie petite étoile, dis-moi si tu le veux. . . " quand, dans l'entrétemps, les nouvieaux "savants" d' l'Eglyîthe ont tous fait fouah du ton et d' l'entends-tu des sîmpl'yes chôthes, lus pliaîthant à sgorner ou mêprîthi tout ch'la, souvent en lus enhèrmélant dé pus'th en pus, en fièrs têtouongnes, en doctrinnes et dogmes au préjudice des toutes sîmpl'yes véthités et condites dé la vie! Est-che don êtonnant qué bein des pièches du peupl'ye à l'entou d'sé saient confondus, né sachant d'en par où'est s'en v'nîn? Véthe, j'avons bein oublié y'a d'longues années l'algèbre et tant d'aut's dé ches "léçons" qué nou chèrchait à nouos fouôrrer dans la cabiche. Mais, j'nouos rassouv'nons 'couo tout à fait bein des dgiex c'mandements (en Français) tchi nouos fûdrent apprîns dès nouos p'tits jours, et tchi, j'espéthons, nouos dgident et nouos gouvèrnent acouo.
Ah ça, ch'est en tchi, quand j'viyons l'th êcolièrs, la jannèche dé ches jours, tchittant l'th êcoles, aspithant et marchant touos fièrs sus l'pas et à l'encontre dé l'âge dé la vraie vie, munnis seulement d'un cèrtificat ou diplôme d"'êducâtion", v'là tchi nouos fait tréfi. Car i' n' sont qué comme des gèrches (jannes brébis) nouvellement touôthées, et don touos nus ès ruses, ès séductions et méchancetés dé chu monde matérialiste, sauvage et cruel. I' n' y'a danme pon dé diplômes à êt' gângnis pouor l'honnêt'té et la bouônté, pon ni n'tout pouor la sîncéthité et la généthôsité. Ches attributs et qualités daivent êt' apprîns dans ses jannes ans, et pis laîssis s'meûthi ou s'matuther à fouorche et à m'suthe dé l'expéthience quôtidgienne.
Mais les pathents dé nouos jours, hardi à bliaûmer, niaîthement ambitieurs et tréjous împâtients dé vaie lus êfants gaffer les pus hauts "prix", né daivent janmais néglyigi dé lus apprendre, en mouontrant l'exempl'ye ieux-mêmes bein seux, les vèrtus d'ancienneté tch'ont 'té tant êprouvées, et prouvées. I' s'peut qué v'là tchi voudra dithe qué ches'th êfants né s' trouv'thont pon au preunmié rang des'th êrudits du pays, mais chein tch'est dé hardi pus d'conséquenche est tch'i' s'sont prêts à peuplier chu même pays d'hommes et d'femmes dé natuthé et d'bouôn sens - des'th attributs tchi n'sont pon seulement nécessaithes pouor l'accomplyissement d'la chrêtchienneté dans chutte vie, mais tchi sont d'exigence pouor les cheins tch'espéthent pâsser l'examen d'entrée dans la préchaine.
Viyiz étout: