Les Pages Jèrriaises

Lé P'tchiot d'Siez Nous.

J'ai un p'tit fréthe ichîn siez nous -
Ah, s'ou saviez s'i' m'venge la vie!
Lé p'tit satan, ch'est l'piéthe dé tous,
I' trile, i' d'piche - tchi train, tchi cries!

V'là tch'est mauvais ch'est comme la gale,
Du tout d'arrêt - est-i' meutîn!
Ch'est saute et danse et tape et hale,
Tchi drôle d'avé et tchi potîn!

Lé p'tit baloque est roupilleux,
D'coléthe et d'eune heumeur dé tchian,
Tréjous boudé et si anglieux,
Mauvais p'tit russe, jé l'vèrrais d'bran!

S'nou l'êtiboque - hale sus les g'veux
Ou qu'nou lî catouoille un orté,
I' honne, i' ouinne - i' vos fait peux,
Faut si p'tite chose à l'faithe ouîmbrer!

J'fais tout ch'qué j'peux pour jouer auve li,
I' m'fait des grinnes, v'là chein qu'j'en ai!
Ofûche i' m'êcopit dans l'yi -
S'nou l'talmouse i' r'piaille qué d'pus bé!

Si j'en appraiche auve des doudoux,
I' gaffe chenna, n'a qu'dé s'engouer,
(Auve ses dents d'lait i' mange' dé tout)
I' s'lique, i' s'brâle - ah, tchi pité!

Nouos gens n'sont pon du tout comme mé,
Ch'est qu'il' en craient tchiquechose du p'tchiot!
Ah, la p'tite mule, dévrai, dévrai,
S'i' n'y'avait qu'mé j'lî teurtrais l'co!

Quand lé p'tchiot dort faut pas qu'y'aie d'brit,
"Veurs-tu bein t'taithe!" nou m'crie sus l'co;
Eune souothis couorre nou pouorrait ouï,
Jé fais d'man mus - nou m'gronne acouo!

Ch'n'est jammais l'mousse tchi fait du ma,
Autchun dro, véthe, et tout l'mêché -
Lé "pouorre pétchiot" en êcapp'sa;
Ch'est tréjous mé tchi sis latté!

Siez nou chest "faut pas faithe chennechîn,"
" Pas touchi là, ouai-tu, têtouongne!"
J'attrappe eune ronde, mé - pas l'crabîn,
I' pauque partout, li, p'tite tchèrouongne!

J'n'ai jammais veu un'té p'tit dgiâblye -
Tch'est qui nouos a bailli d'ité?
Ch'est plieuthe et heurle et pîmpe et rouâblye,
Sécours d'la vie, j'en sis enn'yé!

 

Viyiz étout:

 

Les Pages Jèrriaises