Ah!!! Nos r'véchin en pliein êtè,
Le trèfl'ye êpannis au solei';
L'faucheux, ov marté, cône et faulx,
Fait d'biaux andains dans les grands clios;
J'admithe, en passant, not châtgni...
Ah... maudit bibet... Drait dans m'n'yi...

Là, dans l'gardin, un vièr Breton
Prend san mio d'pain et d'saucisson
Et san p'tit-cidre, en se r'posant
Souos un poummi pour un instant;
J'l'admithe en passant: Ah l'vièr sot
Mé v'là drotchi sus san chabot!!

Nos dêfoueurs, malgré la chaleu'
Man'yient la frouque, et d'puth' de sueu,
Dès le p'tit jour à la nièt v'nue;
Lus bras sont bruns, lus tête est nue.
J'les r'garde en viédghant man pann'yi...
Ah fichu cliou... man dé! Presti!!

Les p'tits viaux, à banon dans l'pré,
Epient par en d'sus du fossè
Qu'i' sont jolis. Tchi biaux grands yièrs!
Lus fins d'ghéthets sont si ligièrs!
Faut les fliatter... Ah! man chapé!!
Lé v'la ti pas dré dans l'cané?

Elie