Av'-ous r'trouvé d'l'avo dans vot' vie d'pis l'avanch'chie d'l'heuthe? Av'-ous r'mèrtchi d's amendements à l'entou, ou ch'est-i' qu'tout est avâthié, avratchi, avraûné et, en génétha, à l'avalrague?
Nou-s'éthait peu craithe qué l'mais d'Avri est l'mais pouor "aver", sénon pouor "avraûner", mais nou-fait, viyant qué l'nom veint probabliément du Latîn "aperire" tchi veurt dithe "ouvri". Et ch'est vrai qu'les flieurs lus ouvrent et parfais les nouages étout auve lus avèrses si nou peut jugi par l'vièr diton tchi nos dit "Avri l'doux, quand i' s'y met est l'piéthe dé tout".
Si l'temps est mus et si l'vent n'est pon à s'avouêti trop, nou peut aller en d'houors à l'ouvèrt, car y'a sans doute des djobbes à faithe: ofûche avieillotter dé tchi dans l'gardîn, ou r'pather l'avaû-no. Y'a d'l'avîn au mais d'Avri, mais Dgieu mèrcie qu'ch'n'est pon la saîson d'l'avoût.
Duthant les vacanches, les avièrs couothent amont et ava, et les pathents sont avinnés à lus braithie. Nou ouait d's ouaîsieaux étout: s'lon l'diton "au mais d'Avri lé coucou crie, s'i' vit". Et viyant qu'au R'nouvé les pensées d'un janne houmme sont touônnées pustôt vèrs l'amour, i' pouôrrait faithe des avanches à sa belle janne vaîsinne (ou si l's Êtats sont d'avis d'changi la louai coumme chenna a 'té proposé à san bieau janne vaîsîn étout).
L's avocats sans doute sont avisés, et s'il' avisent lus clients bouonnement au mais d'Avri, y'étha mains d'aveugliéthie à l'av'nîn. S'nou-s'est avèrti d'sorti au mais d'Avri, i' faudra trouver eune nouvelle démeuthe au mais d'Mai. Véthe, lé mais d'Avri s'avole sus nous, épis nos laîsse et si j'n'avons pon aveint au bonheu chu mais, j'éthons eune aventuthe lé mais tchi veint. Nou va d'l'avant!
Geraint Jennings
Viyiz étout: