Trenton, Michigan, U.S.A.
Lé 20 d'avri, 1968
Moussieu l'Rédacteu,
J'veins d'èrfaithe un long viage tout seu dans man moto, dé Fort Lauderdale, en Floride, à Trenton, Michigan, où'est qué j'sis siez man fréthe Fraînque pour un coupl'ye d's'maines. J'avons dêjà pâlé pus d'Jèrriais dans deux jours qué j'n'avais fait dans les quat' mais et d'mi qué j'veins d'passer dans les pays cauds!
I' sont enn'yants quand nou-s-est touos seurs, ches longs viages-là. J'avais tchînze chents milles à faithe en travèrsant quâsi toute la londgieu d'la pénînsule dé La Floride, l'entchi d'La Georgie, partie des montangnes Great Smoky du Tennessee, et d's Êtats d'Kentucky, Ohio et Michigan. Ch'est lâssant, étout, viyant qu'la grand' partie d'chu trajet-là est par des grand' routes comme vouot' “carriage way” en Jèrri, sénon bein pus larges, et tch'i' faut cachi à septante milles à l'heuthe ou bein nou s'trouve à la vaie d'touos l's aut' motoristes. Lé mains qu'nou-s-est pèrmîns d'cachi dans ces routes-là est quarante-chîn milles à l'heuthe mais nou n'en vait pon souvent tchi vont si douochement!
Nou-s-en pense-t-i', man bouanhomme, dé toutes les sortes, quand nou passe trais jours dé mème à cachi à grand' vitesse quâsi d'un but du pays à l'autre! Ch'est si monotone – et i' faut garder l'yi sus la route dévant sé tout l'temps. Dans des temps j'mé m'ttais à chantonner les cantiques qué j'ai întèrprétés d'l'Angliais en Jèrriais, pour vaie si j'avais oubliyé les mots! V'la tch'aîgue à passer l'temps. Et pis jé m'ttais l'radio du moto en allant, à l'heuthe toutes les heuthes, pour ouï les nouvelles, mais aussi vite les nouvelles finnies, j'l'arrêtais, car ch'est un bargouaîchin et tîntamârre abominabl'ye qué les jannes Améthitchains appellent d' “la musique” qué nou ouait ordinnaithement sus l'radio ichîn! Ch'est quand-mème eune bouanne chose d'en aver iun dans l'moto (i' n'sont pon taxés ichîn), car l'Améthique est si grande, et nou cache si vite, qué nou peut s'trouver dans deux difféthents clyîmats dans l'mème jour, et ch'est c'mode dé pouver ouï tchi temps tch'i' s'en va faithe dévant qué l'jour sé passe. Dans un pays où'est qu'nou peut aver des cyclones ou des tornades d'un moment à l'autre, nou peut prandre des précautions en s'èrnardant dans tchique fort bâtisse eune fais avèrtis en temps, et la police avèrtit tréjous par radio en cas d'bésoin.
À ch't heu qu'm'érvéla en fanmile siez man fréthe, et qué j'peux m'arrêter pour eune sémaine ou deux, j'mé sis mîns à r'garder les gâzettes dé Jèrri tchi m'attendaient ichîn. Entr'autres choses tchi m'întérêssent tréjous sont les lettres des gens tchi font des commentaithes sus l's êvénements du jour. Ch'est seux qu'd'aut' Jèrriais à l'êtrangi sont comme mé, et y'en a tch'êcrivent à la gâzette étout et j'sis tréjous content quand j'vai ieune de lus lettres. V'la tchi m'ramémouaithe qué dans la gâzette du 31 juilet d'l'année passée y'en avait ieune env'yée d'Vancouver, en Colombie Britannique, par lé Sieur Frank Vallois, félicitant l'Académicien Frainque Le Maistre pour lé mangnifique Dictionnaithe Jèrriais, et en mème temps i' m'fit l'honneu d'mentionner mes lettres.
En r'liêsant chutte lettre-là, j'mé sis d'mandé bein des fais si l'Sieur Frank Vallois pouorrait êt' un fis d'iun dé deux pèrsonnes dé chu nom-là tchi vivaient en mème temps qu'man p'pèe et tch'étaient auve li dans l'Bataillon du Ouest d'La Milice Rouoyale dé Jèrri en 1891 (l'année d'ma naissance à St.Ouën), quand la Compagnie d'St. Ouën r'fûsit d'marchi à La Grand' R'veue viyant qu'l'ordre d'marche né la m'ttait pon en tête comme dé bouan drouait.
Ch'tait l'27 d'avri, 1891, et treize dé ieux fûdrent traduits en Cour dé Police Correctionnelle lé 18 dé mai en r'vénant et fûdrent condamnés à peine dé prison. Man p'pèe en 'tait iun, et il en 'tait bein ordgilleux! Né v'chîn lus noms : Adolphus Carcaud Le Boutillier (Sergent), Arthur Elie Le Blanq (Corpotha) et les soudards Philippe J. Syvret, Adolphus O. Hacquoil, Alfred de Vicq, Charles W. Vallois, Philippe Vallois, Charles Surcouf, Frank Le Cornu, Alfred Philippe Le Cornu, George Francis Le Feuvre, Philippe de la Perelle et Philippe George Hacquoil. Eh bein, lé Sieur Frank Vallois dé Vancouver es'sait-i-fis, ou du mains pathenté, à ches Ph'lippe et Charles W. Vallois-là ? S'i' liet chutte lettre-chîn i' vouos êcritha p't êt' eune lettre à vouos l'dithe!
J'vai, en liêsant la gâzette du 7 dé mar, 1968, qué l'Sieur Fraînque Le Maistre a 'té êlu Vice-Président d'La Société Jersiaise. Mes félicitations! I' méthite bein l'honneu. Sans faîsant la minne dé rein, comme nouos dîsait l'Juge Francis Vibert Le Feuvre dans san vivant, Fraînque a tréjous travailli dû pour La Société, et ch'est li tch'est à r'mèrcier pour l'existence du Musée d'Agritchultuthe à La Hougue Bie.
J'sis bein content d'liéthe qué Moussieu L'Sueux dît, dans san discours à la rêunion d'La Société, qu'y'éthait p't êt' du run dans les nouvelles prémisses du Musée pour tchique sorte d'associâtion auve L'Assembliée d'Jèrriais. À m'n idée, ché s'sait mangnifique si les deux sociêtés pouvaient lus rêuni dans la mème salle!
George d'La Forge
Viyiz étout: