Touos les poètes, lé temps passé
Chantaient l'arrivée du r'nouvé.
Les plyies d'Avri, les flieurs dé Mai.
L' cri du coucou et la biauté
D'l'èpine èpannie sus l'fossé.
I' pretendaient avé vers l'amour
Les garçons touonnaient lus pensée
Et qu'les hardelles, lé long des jours.
Habill'yies dans lus bieaux atours,
Né d'mandaient qu'à être admithées.
Mais ch'est là des sornettes d'autr' fais
Les choses né s'passent pas comme chonna.
Au r'nouvé, les jours sont trop fraids.
Nous a des r'frédeuses ès ortés,
Et l'amour né date pon dé d'là!
Non, ch'est l'mais d'Juin qu'i' faut louangi;
Lé mais qu'apporte du maq'thé
Et des pihangnes à bouan marchi
Et des grouaisilles et un tas d'tchi
Qui vaut bein mus qu'chein qui n'est qu' bé!
Vive lé mais qu'apporte à Jèrri
Eune bouanne récolte d'belles patates!
Qui donne tchique hérpins au fermi,
Et qu'êcrit cash au lieu d'credit...
Vive lé mais d'Juin! N'y'a rein qui l'batte!
Viyiz étout: