Lé mais d'Mar est tout pliein d'întéthêt. Ch'est en tchi j'avons un vèrbe pouor dêcrithe chein tchi s'adonne duthant chu mais. Si tchiquechose marchinne, chenna veurt dithe qu'oulle arrive au mais d'Mar. S'lon un diton: "Quand Pâques marchinne - peste, dgèrre ou fanminne". Ch't' année Pâques marchinne, véthe, et si j'n'avons pon 'té achouêmis pouor achteu atout peste, dgèrre ou fanminne, y'a sans doute d'aut's malheurs tchi marchinnent. Et nou peut tout sîmpliément dithe qué "Mar marchinne" pouor faithe penser à du mauvais temps.
Jules César fut achouêmi, li, ès Ides dé Mar en l'an 44 d'vant l'Christ. Mêfi'-ous don d's Ides dé Mar, car i' marchinnent tréjous. Et ch'tait les Romains tchi donnîtent lé nom du dgieu Mars au mais qué j'connaîssons coumme Mar. Mars 'tait lus dgieu d'la dgèrre, et quand Mar marchinne nou pouôrrait înmaginner coumme tchi qu'les gens du temps pâssé éthaient creu qué Mars 'tait mârri et à martéler atout ses armes. Tout coumme, nou dit étout qué "quand Mar martèle, Avri coutèle".
Mar soulait êt' lé preunmié mais d'l'année quand nou-s'espéthait l'arrivée du R'nouvé et les preunmié p'tits j'tons tchi marchinnent dans l'gardîn. Quand nou vait des flieurs tchi marchinnent, nou peut rêver d'frits à v'nîn - mais i' n'y'a pon d'pommes dans les gardîns et ch'est bein trop heûthi pouor penser au mar du S'tembre. L'êtamp'sie né marchinne pon et nou n'couoche pon l'mar au mais d'Mar.
Nou n'joue pon à la gamme dé câsse-mârron au mais d'Mar nitout, car les mârrons n'marchinnent pon. Mais nou n'dit pon qu'il' octobrent; Noué n'a janmais dézembré; et nos vacanches d'Êté n'aoûtent janmais. Nou n'peut pon s'rêjoui d'la févriéthie d'la Saint Valentîn, ni d'la novembréthie d'la Séthée d'Guy Fawkes. Nan, ch'est raîque lé mais d'Mar tchi marchinne, atout ses pestes, dgèrres ou fanminnes, et tout chein qu'nou peut faithe ch'est d'maûdithe la fichue marchinn'nie et mârronner qu'Mar est tout en margalot. Et les vacanches ès êcoles sont margouoillies étout par d'ssus l'marchi!
Geraint Jennings
Viyiz étout: