I paraît ch't année-chin,
Pâque a l'idée de v'nin
Tei faire la bouonn'mine,
Et que seul'ment pour ch'là
I deit y-arriver ma,
Peste, guerre, ou famine:
Ah! pour ch't-i-là qu'y crait,
Ch'est bein triste devrai.

Bouonnes gens, préparous
Pour chu temps là si doux,
S'ous y portez cryanche;
Car pour de mei, j'my perds,
Et n'y prends autchun mert,
En ch'là je n'ai pon d'fianche.
J'vos di, je n'y crei brin,
Car ch'est du vrai niolin.

La pervenche flieurit,
La violette souorit,
Coum' dans toute autre année,
La g'zette a êpani,
Et l'ouésé fait sen nid.
La vie n'est pon dounée
Pour faire d'même un d'vin
Des choses de l'av'nin.

Seit le bein venu, meis d'Mars,
Malgré touos tes êcarts,
Quéque ov tei Paques veinge,
Je ne tei craignons pus,
Au Printemps tu ouvras l'hus,
Que ch't-i-là seul tei crainge
Qui peut creire ès shorchiers
Du vier temps des bouons viers.

Pour qu'est qu'nou-z-érait peux
Quand là haut dans les cieux,
Il y-en a Iun qui ville
Sus touos nous ichin bas,
Qui compte touos nos pas,
Empêchant qu'iun dredille.
Jamais I n'envie rein
Que chein qui nos est bein.

A.A.L.G.