1917.

JANVI. L'annèe c'menche au prumi d'Janvi, qui s'sa un Lundi. A mains que l's'Etats s'en décident autrement, che s'sa un jour férié. Chinq ou siez jours pus tard, anniversaithe de la Bataille de Jerry, qui s'trouve'tha ch't'annèe être le même jour que l'vièr Noé. Entre le prumi et l'six du mais, maladie d'une ex-Chant'gni du Ouest, qui pouorrait mettre ses jours en dangi s'ou d'veint sérieuse. Tchic jours pus tard, y'un des Juges de la Cour Royale es'sa absent des Etats, par indisposition. Nou ouitha pâler de grand' tchèthues du bord du Vau d'la Mathe. Les aubergistes erchev'thont p't'être ordre de frumer de pus bouanne heuthe. Une êlection étha lieu en ville, à la fin d'la gestion de MM. Cuming et Vigot. La Nouvelle Chronique annonça qu'yun d'ses abonnés a célébrè ses neuches d'or et qu'li et sa femme se portent bein et qu'il est à espéther qui verront lus neuches de diamant. Y'étha une entchête le lend'main sus l'suicide du principal héthitchi du vièr coupl'ye en tchestchon. Devant la fin du mais, une forte brise du Nord-Vouest ou du Su'Est, abattra des poummiers dans un canton exposè. Le 30, Elie célebrétha san jour de naissance. Le 31, Elie f'tha la grasse matinèe. Les Grouvillais pâl'lont d'une êlection pour Chantgni.

FÉVRI. Duthant la prumié s'maine du mais, y'étha hardi d'monde enchiffrenès et l'deuxième Dimanche plusieurs prédicateurs ergret'tont d'n'avair pas prins pus d'un mouochet. D'vièrs le dix, la Nouvelle Chronique annonc'ça que les gens sont à plianter dans les côtils. Les Etats éthont plusieurs séances dans l'couothant du mais et i' pouorrait y'avair du feu d'satchi entre certains des members s'lon les sujets en voie d'distchussion. Nou ouitha pâler d'une Députation siez Moussieu Perchard. Plusieurs persouannes êprouv'thont à mettre le Counnétabl'ye d'la ville et l'Evening Post d'accord. Le Counnêtable erfusera en trouvant à s'pllaindre de l'Evening Post. L'Evening Post erfusera en trouvant à r'dithe sus l'Counnétable. La malle arrivetha probabl'yement tard trais jours de siette à cause du mauvais temps d'viers la traisième semaine du mais. Y'aitha une raidde bataille pour la pliaiche d'Enregistreux dans une pâraisse rurale. Un offici d'Millice et sa belle-mèthe pouorraient avair des patholes à propos d'une affaithe de conscience. Nou r'mèrquétha qu'les femmes éthont pâlè mains dans chu mais ichin que dans les autres mais d'l'annèe.

MARS. Le temps pathaît d'vair être fraid une grand' partie du mais. Un principa d'pâraisse rentrétha caud'lin deux jours de siette. Un tas d'lapins mouorront d'une mort violente. Les officiers du Herd Book apprendront probabl'yément qu'un fermi d'une pâraisse rurale a êprouvè à faithe passer une geniche coumme étant la fille d'une vaque qu'a yeu un boeu. Le fermi ditha que ch'n'est pas vrai et y'étha du feu d'satchi. Une terribl'ye distchussion est prédite entre le Recteur et les Surveillants d'une paraisse, y'où qu'y'a déjà y'eu du combat dans l'passè. Le Juge Vaudin étha plusieurs ivrouognes devant lis déviers le mitan du mais et il en enviétha pus d'yun en prison pour un mais avec travaux forchis. Un couotuthi bein counnu en ville pacqtha ses telles.

Le querre d'un Député faillitha verser par dessus un lopin d'bannelais au bas d'un mont et les Inspecteurs de la Vingtaine en ouïthont pâler. Une seance des Etats es'sa suspendue un jour de grand'mathèe. Le Duke es'sa obl'yigi d'aller vaie si les bouies des Minquiers ont besoin d'être erblianchies. Les members du Comité des Cauchies ithont à bord. Le lendemain, y'étha une grand' fricach'chie d'ormers dans difféthentes parties d'Jerry. Les Foresters perdront y'un d'lus membres. A la fin du mais, le monde se pliaindront du mauvais temps. Y'étha du bri entre deux fermiers au sujet d'un prix à un Show.

AVRI. Y'étha un paisson de happè l'prumié jour du mais. Nous verra les jours ralougni. De grand' neuches éthont lieu en ville, entre des jeunes gens appathentès à la cousine de la belle-soeu d'un ex-Counnétabl'ye. Mister Humby êcritha d'la poésie pour la Post au sujet du r'nouvé. Un marchand d'tcherbon examin'na ses livres des derniers siez mais et décid'da qu'i peut acater un autre automobile. A une réunion d'la Chambre de Coummerce, Mister Henderson se mettre à d'viser et il étha pâlè sus vingt-deux sujets quand i' s'arrét'ta. Les tchestions du prix du tcherbon et du gaz ne s'sont pas distchutèes dans la Chambre. Y'étha deux jours de vacances dans l's'envithons d'Pâques. Un Recteur se pliaindra que les assemblièes ecclésiastiques n'attithent pon hardi d'monde. La Nouvelle Chronique annonc'ça que la premiè cherge de patates a 'tè apportèe en ville et à 'tè vendue à Messieux Tels et Tels pour Tant. Un Juge s'assiétha sur un Député dans les Etats et l'Morning News publietha une lettre anonyme qui ne f'tha pon grand pliaisi au Juge. Dans l'couothant du mais le Counnêtable de St. Sauveux ditha qu'il est décidè de se r'tither d'politique. Nou lis rêpondra qu'i' n'y a pas moyen d'faithe sans li mais, en cas qui tcheindrait à sa pathole, nou garde les yièrs ouèrts pour lis trouver un remplièchant.

MAI. L'Evening Post publietha tout probabliément une poésie de Mister Humby sus l'Epine flieuthie. Le Counnétabl'ye d'une paraisse de campagne es'sa appelè à tâchi d'raccorder y'un des membres de sa police et san bieau-péthe. Un individu bein counnu est m'nichi d'avair à filer hors Jerry pour certaines choses que l'prophète ne peut pas dêchiffrer trop nettement. Un fonctionnaithe haut plièchi annonça de bouannes nouvelles à ses amins. Le pico pathaît dghetter les couochons dans pus d'une partie d'l'île. Y'étha d'la correspondauce pon trop édifiante sus la gazette. Un tas d'monde se mettront à porter des chapieaux d'paille. A la Trinité, Nicq'less Le Quesne et George Dorey verront une députation et, malgré la dgherre, doun'nont une fais à baithe à les amins. Il arrivtha des Bretons en Jerry. A St. Louothains, y'étha du pâl'ment au sujet d'une êlection pour Counnêtable et d'une autre pour Chantgniers.

Le Baill'yi f'tha un grand discours. La Nouvelle Chronique annonc'ça la mort d'un bon et paisible citoyen. Belle appathence de fruit sus les pommièrs. Epidémie d'rouogeule dans une êcole êlémentaithe. Y'a des signes d'un grand mouvement de tchic sorte ès envithons des cauchies, sustout d'vièrs la fin du mais.

JUIN. Un personage bein counnu arriv'tha en Jerry. Maladie sus les lapins. Démission d'une maîtresse d'êcole du Dimanche pour cause de jalousie. Mister Humby et Mrs. Sarah Benson êcrithont des vers pour la Post. Un propriêtaithe fonci étha une diverse dispute avec san fèrmi au sujet d'avair mins pus d'nitrates dans la terre que sa bail ne l'y'allouait; l'affaithe pouorrait aller jusqu'en Cour si les femmes ne s'en mêlent pas. Jack Le Sueux pathaît d'vair acater yun des pus bieaux ch'vaux que nou-z'ait jamais veu en Jerry. Les gazettes pal'lont d'un engagement entre jeunes gens appartenant à deux bouannes vieilles familles, à la grande jouaie des vièrs qui savent qu'i' y'a raidde de rentes des deux bords. Un aubergiste se r'tith'tha d'commerce, fortune faite. Le testament d'une personne hardi counnue f'tha grand dêpiè à certains d'ses pathents. Tout l'long du mais y'étha du travas à tigue de corps dans les fermes.

JUILLET. Grande chaleur plusieurs jours de siètte. Appathence de maladie dans deux-trais clios d'patates dans les terres basses. Accident au bas d'un mont condîsant à la ville. Grand embarras dans l'coummerce des patates. Feu sus les falaises au Nord de l'Ile. D'vièr le mitan du mais, nou ouitha pâler d'une chose extraordinaithe, qui f'tha hardi d'pal'ment parmi les vièrs. Mess Bisson pens'sa à faithe un p'tit viage pour le bénéfice de sa santé. Deux Recteurs éthont quâsiment bisto à une réunion d'Comité, mais un juge sauv'tha la situation. Distchussion dans l'Comité des Finances.

AOUT. Elie prophétise au c'mench'ment du mais une semaine sans grands êvènements, sinon un orage, des neuches et un sèrmon ermèrquable par le Doyen ou par un autre ministre. Les marchands d'patates caltchul'lont qu'i' n'ont pas fait tant mal dans la saison. Grande cérémonie publique y'où qu'y'étha hardi d'monde. Mister Humby êcritha un poême sus A quiet summer evening pour n'importe tchi gazette qui voudra l'publier. Grand' pêque de maquéthiaux au large des Pierres de Lecq. Les pouorres gens s'pliaindront qu'la vie est duthe. Accident d'automobile à une carre de route, qui pouorrait bein être suivi d'une poursuite devant l'Juge Vaudin. I s'sa tchestchon d'une députation à deux Chantgnièrs dans une paraisse oùest qu'ya des barracks et un p'tit canon.

SEPTEMBRE. Les jours raccourchethont visibl'yement. Y'étha une bataille dans Pier Road, une séthèe, entre deux femmes de mauvaise vie. Les fermièrs sont avertis de faithe l'avou en temps car le Stembre ne s'pas'sa pas sans pl'yie. Naissance de jumelles siez un moussieu bein counnu dans l'Est de l'Ile.

Le Juge de la P'tite Cour étha à êpinotchi un drôle de mêlin-melo qui f'tha d'la bouanne copie pour les gazettes. Signe de mathées d'êquinoxe, avec forte brise sur l'Esplanade. Mort d'un bon et paisible citoyen si jamais il en fut (dans les patholles à Mess Bisson). Les tomates c'menchi'chont par être vendues à bouan prix mais nou se d'mand'da si les batcheaux veindront aussi rédghuliéthement coumme nou voudrait. Nous entendra pâler d'un individu qui prendra la poudre d'escampette, sans s'gêner d'payer ses dettes, à mains qu'i' n'trouve le moyen d's'arrangi en temps. N'y'étha pus dghethe de bat'tîe (sinon dans les granges) après la fin du mais.

OCTOBRE. Le mais d'Octobre ne s'pas'sa pas sans êven'ments mais l'av'nin n'est pas assez cliai pour être facile à liaithe. I' pathaît en tout cas, d'vair y'avair dispute entre deux gazettes. Plusieurs fonctionnaithes publics en vacance sembl'yent d'vair être mêlés à une tchuthieuse aventuthe de tchi qu'nou ouïtha pâler. Dróle de frédaine par un n'veu d'un houmme qu'à 'tè longtemps dans la police. Jours de pl'yie. Une vaque du sang des Majestys s'sa vendue bouan prix.

NOVEMBRE. - Un tas d'Français ithont visiter les chimtchéthes au c'mench'ment du mais. Nou ouïtha pâler d'un personage de mauvais r'non brûlè en effigie deviers le 5. Y'étha des mouochiaux d'poummes dans les clios. Le prix du beurre pouorrait bein n'être pas satisfaisant pour tout d'monde. Les Etats es'sont obl'yigis de s'otchuper d'estimer lus situation financiéthe pour l'annèe tchi veint. Y'ètha des distchussions sus plusieurs item et l'Bailli pouorrait bein rapp'ler un Député à l'ordre. Dans l'couothant du mais, nou peut s'attendre au p'tit êtè d'Saint Martin. Les fèrmièrs pouorraient bein être obl'yigis d'alouangni l'cidre un mio si les poummes ne rêpounnent pas mus que tchic fais. Un êcrivain s'apèrchev'tha qu'il a fait une erreur dans un compte, à sa perte, et i' décid'da de s'rattraper sus l'prechain pigeon. Y'aitha du vraic d'ramassè si la mer en apporte au pliein. Nou-z'entendra pâler d'une tchuthieuse affaire de famille, qu'avait 'tè confiée, en grand ségrêt, à deux femmes qu'avaient promins fliabliément de n'en dithe pas un mot …

DECEMBRE. Dès l'c'menchement du mais, la campagne f'tha triste mine, les boies n'aithont pus d'fielles, et les flieurs éthont dispathu des gardins sinon y'où qu'le vent les a laissies. Les saithèes s'sont fraides et nou verra d'la plyie plusieurs jours de siètte. Elie consille es vielles femmes de mettre une bouanne couvertuthe de pus sus lus liet et d'n'oublier pon qu'les cotillons d'molleton et d'laine, à la vielle mode, sont autrement pus c'modes et plus cauds que les articl'yes à dentelle et en insertion à travers de tchi qu'nou vait les femmes de nos jours. Les poulettes du mais d'Mars se mettront à ponder et si l'prix des oeu's se garde aussi haut coumme il 'tait, chaque poulette vaudra san paids en or. Elie ercomande don sérieusement de n'tuer pas les poulettes devant qu'lus ponaison s'sait finie et occouo, si ch'en est d'bouanne race, non peut les laissi une autre annèe. Y'aitha diversément d'bri dans une certaine cause en Cour. D'vièrs douze jours devant la fin du mais, un tas d'couochons, de canards et d'picots mouorront d'mort violente. Pâl'ment d'êlections à St. Ouen, à St. Jean et la Trinité. Il arriv'tha en Jerri un personnage qui s'crait hardi important. Le lend'main du jour de Noé (qu'est le 25 du mais 'ch't'annèe) n'y'aitha pas d'commerce en ville, sinon siez les apotitchiers. L'annèe 1918 suivra 1917 de si près que ch'est à peine si l'monde s'aperchev'thont du changement.

ELIE.
 

Viyiz étout:

• Eche eun oubli?

• Deux mots - Adréchis spécialement ès auteurs Jerriais

• La Gazette!

• Marchandise bain vantée

• Occuo "Deux Mots"

• Nos lecteurs!!

• Un R'proche

• Au P'tit Bulletin

• Un Sourd et Muet qui pâsle