Les Pages Jèrriaises

L'Année Bissextile


I' y'a trente jours en Septembre,
En Avri, Juîn et Novembre.
Les aut's mais sont fanmeux pouor
Lus trente-tch'ieunième jour,
Mais l'pouôrre Févri
N'en a qu'vîngt-huit,
Et un vîngt-neuvième pouor les fil'yes
Pouor s'engagi ès années bissextiles!

L'houmme propose et Dgieu dispose, mais j'arrivons au jour quand les femmes, s'lon la couôteunme, peuvent proposer ès cheins tch'ont oublié, ou mantchi, dé d'mander la tchestchion à la Saint Valentîn.

S'lon eune vielle légende, ch'tait Sainte Bridgette en Irlande tchi tâchit d'pèrsuader Saint Patrice dé donner ès fil'yes d'san monastéthe lé drouait dé d'mander ès hoummes d'lus mathier, car les mêssieux là-bas n'taient rein qu'des landrinneurs. Saint Patrice rêponnit à Bridgette qu'les hardelles éthaient l'opporteunité d'proposer eune fais touos les quat' ans.

Aujourd'aniet les d'mouaîselles n'ânionnent pon dans l's affaithes du tchoeu et i' n'sont pus oblyigies d'attendre bein longtemps pouor ouï les mots, “Té pliaît-i' m'mathier?”

Et en tout cas, s'i' n'vos pliaît pon d'vos mathier, l'monde a bein changi et ous avez don l'chouaix d'vivre ensembl'ye dans chein qu'nos anchêtres app'laient l'contchubinnage. Mais s'i' sembliéthait pustôt qu'les contchubîns et contchubinnes ont contchéthi dans la sociêté, y'a acouo des gens tchi voudraient lus fitchi auve lé noeud du mathiage.

Dans tchiques pays achteu, les parchonnièrs d'un même sexe, ieux étout, ont l'drouait d'enr'gistrer lus êtat civil ou même d'lus mathier. Mais né v'chîn la tchestchion: tchi qui dait proposer à tchi? Assa, s'nou-s'attend l'année bissextile, nou peut s'ent'-proposer sans aver à s'badrer la tête!

Qué ch't' année bissextile apporte un trais-chents-souaixante-siêxième jour dé bonheu à tout l'monde, et s'i' y'a des fil'yes – ou même des vielles fil'yes – tchi sont d'avis d'proposer à lus galants chu vîngt-neu d'Févri, j'voudrêmes lus souhaiter bouonne cache!


Geraint Jennings
 

Viyiz étout:

 

Les Pages Jèrriaises