Comme au Dimanche
Succede le Lundi,
Une annèe cmenche
Des que l'autre a fini:
Telle est la ronde
Que depis le cmench'ment
Observe l'monde
Et dure êternell'ment.
Smaine aupres smaine,
S'entresievant de pres,
Forme la chaine
De qui nou fait les mais:
Ainchin l'annèe
Et ses quatre saisons
Est composèe
De douze itès chainons.
Nou peut s'attendre
A du fraid en Janvi;
La nèi peut d'scendre
Aussi bein en Fevri:
A la durèe
De la fraid jus-qu'en Mars
La renommèe
Joint le nom de “bouffard”.
D'la nere heronde,
Quand veint la fin d'Avri,
Nou vait la ronde
Du coucou nou ouait l'cri:
Des bouais la fieille,
Et des vacques le lait,
Et sen doux ciell
Font aimer le mais d'Mai.
En Juin nou fauche,
Et dèja le Êpis
Du grain qui hauche
Se montrent Êpannis:
Nou cherche l'ombre
Quand veint le mais d'Juilet,
Le frais le l'sombre
Aupres le biau solèi.
Le grain se cope
Et nou finit l'avou,
Le fruit s'dêvlope
Dans l'couorant du mais d'Août:
Quand veint Septembre,
I' faut être préparès
A bein comprendre
Qu'les biaux jours sont passès.
Pourtant Octobre
En a parfais de biaue;
A l'homme sobre
I' fournit hardi d'iaue:
Bane su Novembre
Est partout à la main,
Et l'gris Décembre
Est tout aussi vilain.
P.L.
7/1/1873
Viyiz étout: