I' s'en va y'avé élection dans la paraisse a Cliem R'non, et j'sis engagi, a raison de djix s'hlings par jour et me neurituthe, a travaillyi la paraisse dans l'intéthet d'not candidat.
Not' candidat, je n'le noumme pas, pour le moment; che s'a eunne surprinze pour le séthée d'la Nomination; persounne ne s'doute du coup qui s'manigançe, et l'sien qui s'ché seux d'être èslu sans opposition s'en va avé la pus grande surprinze de sa vie.
Not' candidat - nou n'se doute pas tchèche - est un houmme de grande capacité. Il a 'té en mé; n'y'a pas a l'battre pour prendre un riz dans eunne douôle de filain; ses gniches fidjuthent dan l'Milk Record; il est rârement l'arriéthe dans ses comptes; il a 'té dans l'grand-banc au mains très fais a ma counnaissance, et les prédicateurs locaux sont unanimes pour dithe que sa femme est eunne diverse bouonne cook.
Quand a ses opinions politiques, i' n'n'a pas! et j'soummes d'avis, nous qui soummes du Coumité, que v'la tchi n'fait absolument rin a la chose. j'lis dounnons permission - s'il est èslu - de voté "anyhow," d'un bord ou d'lautre, avec ou contre le Recteu, pour ou contre l'Amend'ment, du bord des Juges, ou avec le sien qui pasl'la pus haut! V'la tchi' n'fait absolument d'rin. La grande chose, ch'est d'envié l'candidat actuel au pilôzi.
Mais 'ou comprenez bin que je n'm'en vais pas dvîzé d'même ès élécteurs. v'la tchi n'pouôrait jommais faithe! Faut trejous proumettre monts et merveilles, ès élécteurs. a bon d'yeux savent que ch'est pâslé pour ne rin dithe, mais tout d'même s'nou veurt embliuté l'élécteur, i' faut pâslé d'Progrès, d'Economie, d'Amelioration; faut promettre de faithe des Loués pour que rin n'sait chi sinon ch'que l'élécteur à s vendre. J'ait fait la d'sus eunne liste de tout ch'que not' candidat s'en va faithe, s'il èst èslu, et l'Coumité a avoué qu'nou n'put djethe menti avec pus d'apliomb.
J'îthai d'maison en maison, et ché s'a sustout ès femmes que j'm'en prendrai, Laïzé m'a rensignyi coumment s'y prendre pour lus en faithe a-créthe: "Et si la Missis est d'tan bord, tu tchins s'n'houmme," qu'ou m'a asseuthé. Ch'est-tan-tchi, nou m'vèrra d'maison en maison. J'embrachai l's'èsfants, j'dithai a Missis qu'ou rajeunit touos les jours, et s'ou m'offre des merveilles, j'y'en d'mand'dait la r'cette en disant qu'Laïzé n'es apprèche pas d'un bieau bu.
J'avons prépathé les "Speech" du proposant. Un bouan long speech pour ne dithe rin sinon qu'not' candidat est près a boulversé toute la cambuse si la paraisse y'en dounne mendâtion - ous en avez souvent oui ditets. Et y'etha des raffraîchissements après la Reunion! "Leave it to me," que j'dit au Coumité. "Les raffraichissements, Messieux," que j'lus dit; "faut pas être r'gardant a eunne gniche ou deux près." Tout l'monde s'a binv'nue - même les siens d'l'opposition. Et a lan fin d'la séthée châtchun remportétha siez li un p'tit patchet d'surprinzes pour la Missis, amathé d'riban a nos couleurs. Ch'est m'n'invention, chette la, et j'en cré hardi!
"Mais tchès qu'en est d'vot politique?" ou me d'mandez. Fiche de la politique! Mais, bachoards qu'ous êtes, tchès qu'la politique d'un Deputé d'campanne compte pour tchiq'chose dans l's'Estats? quand nou vos dit qu'chest simpliément pour l'amour de tumbzé l'autre! Que ch'sait Jack, ou Tom, ou Cliem, ou Mathieu, ch'est i' pon tréjous la même chose au bu du compte? J'soummes - si vos faut absolument un programme - pour l'Economie, l'Progrès, et eunne taxe sus les garçons qui n'sont pon mathiés a trente ans. Wot more do you want?
Piteur Pain
25/11/1916
Viyiz étout: