Eune p'tite histouaithe pouor la Saint Valentîn
La 2000e page sus les Pages Jèrriaises
Matt hésitit d'vant l'us d'la boutique. Un mio nèrveux, i' r'gardit sa mouontre. Eh bein, il avait dêjà pâssit vîngt minnutes à marchi et r'marchi par la boutique, êprouvant d'trouver un brîn d'couothage pouor pouver y entrer. Et n'l' èrv'chîn sus l'trottouaithe à r'penser chein qu'il avait dêcidé d'faithe.
Coumme la Saint Valentîn appréchait, Matt avait creu qué ché s'sait eune bouonne idée d'faithe tchiquechose pouor donner eune p'tite surprînse à Siobhan. Né v'là quâsiment un an qu'i' 'tait auve lyi et faithe tchique chose dé spécial pouor la Saint Valentîn lî'avait semblié... bein... c'mode pouor mèrtchi ses sentiments pouor lyi.
Et en tout cas, ch'est d'pis bein du temps qu'il avait pensé d'faithe dé même. San fréthe l'avait ieu fait y'a deux'trais années et Matt avait r'mèrtchi l'êffet quand san fréthe 'tait à sé spalmer ou à jouer à football dans l'gardîn l'Dînmanche l'arlévée. Sus san bras, san fréthe avait iun d'ches symboles-là Celtiques - et né v'chîn Matt sus l'trottouaithe d'vant la tatouéthie à hésiter.
Matt soupithit et poussit la porte ouvèrte. Dans la tatouéthie, y'avait des portraits d'tatouages sus les muthâles - d'la pé dêcorée auve l'art du tattoueux: des bras, des g'vil'yes, des dos, d's êpaûles, des seins et des pliaiches împôssibl'yes à identifier, touos mèrtchis d'dragons, papillotes, fi d'fé, dauphîns, ouaîsieaux, symboles Chinnouais, des crouaix et d'aut's choses. Mais ché n'fut pon pouor ches choses-chîn qu'Matt vînt dans la boutique, ni pouor les boucl'yes et bagues et p'tits but d'argent'tie tchi 'taient exhibés dans des p'tites armouaithes vitrées sus les muthâles et souos l'compteux.
Pouor les pèrch'chies, Matt n'y'avait pon même pensé. Nou fait, pouor la Saint Valentîn i' 'tait d'avis d'faithe eune surprînse pouor Siobhan par aver un p'tit tatouage. Ch'est qu'oulle avait deux colombes sus s'n êpaûle - qu'Matt aimait bein vaie quand Siobhan 'tait en bikini ou p'tit tee-corset, et caresser duthant des moments au liet. Et né v'là chein tchi donnit l'idée à Matt dé s'faithe tatouer étout. Et pouortchi pas? Les tatouages 'taient hardi faichonnabl'yes auprès tout: les mannetchîns sus la prom'nade ès cats et les popstars en avaient au jour d'aniet. Et don ch'tait riditchule dé senti si nèrveux - l's hoummes sont s'posés d'êt' braves, pas d'aver peux d'l'adgulle du tatoueux. Mais si Siobhan en 'tait capabl'ye - li, Matt, pouôrrait l'faithe étout.
Driéthe lé compteux d'la tatouéthie, y'avait un janne houmme a liéthe un magasîn entouor les tatouages. Il avait des boucl'yes d'ouothelles - trais à gauche et quat' à drouaite - et l'nez pèrchi étout.
“Bouônjour!” qu'i' fit.
“Bouônjour,” rêponnit Matt. “Jé phônis hièr... entouor un tatouage. J'fis un appointement. Extchûthez-mé, si j'sis un mio en r'tard. J'sis un mio nèrveux”
“Ah véthe,” dit l'janne tatoueux, en r'gardant sus san calendri. “Ch'est-i' la preunmié fais?”
“Oui,” dit Matt. “Et j'sis d'avis qué ché s'sa la dreine fais étout.”
“Ah, eune fais n'est janmais assez,” dit l'janne houmme. “Mé, jé c'menchis y'a d's années.” I' r'brachit les manches dé sa c'mînse pouor mountrer eune brachie dé designs.
“Nou fait,” dit Matt. “Pouor dé mé, iun s'sa bein assez. Ch'est seul'ment eune p'tite surprînse pouor ma douoche pouor la Saint Valentîn.”
“En chu cas, nou dithait qué ch'est mus qu'lé chocolat,” r'mèrtchit l'janne houmme.” Chenna n'mets pon du paids!”
“Coumme jé mentionnis sus l'téléphône, j'aim'thais bein aver un p'tit tchoeu,” explyitchit Matt. “J'crai qué ch'est assez sîmpl'ye.”
“Véthe-dgia!” excliâmit l'tatoueux. “Autchun problième. Un tout p'tit tchoeu en vîngt minnutes.”
“Ch'est bein,” pensit Matt, tchi dit, “Fait-i' grand ma?”
“Nânnîn,” dit l'tatoueux. “Ch'est coumme les freunmions. I' n'faut pon aver peux.”
“Oh, j'n'ai pon peux,” dit Matt. “Nou-fait! Ch'est tout sîmpliément ma preunmié fais, et j'sis un mio nèrveux - et chennechîn s'sa pouor tréjous!”
“Véthe,” dit l'tatoueux. “J'dis tréjous qu'la tatouéthie est eune chose bein séthieuse. J'm'en vais vos mouontrer l'êtchipement avant d'continnuer.”
I' sé l'vit d'un ambron, à la surprînse dé Matt, et crouaîsit la boutique à un ridgeau.
“Né v'chîn not' p'tit appartément où'est qu'j'faithons not' travas.” Et il înditchit eune p'tite armouaithe sus la muthâle. “Et né v'chîn lé stérilisateuse.”
“Dans chutte machinne,” il înditchit la machinne à tatouer, “ j'mettons eune adgulle fraîche et l'encre veint d'chu rêsèrveux-là. La machinne fait du brit, un p'tit brit, et y'a l'sentiment dé freunmions sus la pé. L'piéthe est dé n'pouver pon gratter ni frotter la pliaiche où'est qu'nou-s'est à tatouer. Né v'là chein tch'est enn'yant, mais la tatouéthie n'fait pon grand ma - mais chenna dêpend d'la pliaiche sus l'corps sus tchi qu'nou veurt mett' un tatouage.”
“Hmmm,” dit Matt.
“Et chu p'tit tchoeu à vous? Sus l'bras? Coumme chennechîn?” d'mandit l'tatoueux en rouôlant eune manche acouo eune fais et mouontrant un portrait sus la muthâle.
“Nânnîn, mèrcie,” dit Matt. “J'avais l'idée d'ver chu tchoeu un mio muchi, où'est qu'nou né l'vèrrait pon dé couôteunme. Sus eune fêsse en bas du dos. Pustôt ichîn.” Et i' mouontrit la pouchette dé driéthe dé ses jeans.
“Et ch'est bein populaithe étout,” dit l'tatoueux. “Y'a un tas d'muscl'yes et d'graîsse là et chenna n's'en va pon faithe du ma du tout. Êt'ous prêt?” Et i' r'brachit ses manches acouo eune fais, mais pouor lé travas chutte fais, coumme i' prînt eune longue blianche casâque dé sus un cro sus la muthâle, et m'ttit des gants d'seurgien.
Matt soûfflyit, et dit, “Oui. J'sis bein prêt.”
Driéthe lé ridgeau, y'avait eune manniéthe dé tabl'ye ou longue tchaîse sus tchi Matt s'allouongnit. I' délyit sa cheintuthe et baîssit ses jeans à seule fîn d'exposer lé haut d'ses fêsses.
Lé tatoueux dit, “J'm'en vais toucher la bouonne pliaiche pouor lé tatouage. Né v'là. Ch'est bein la pliaiche là?”
“Oui,” rêponnit Matt. “Mais pas trop grand. Un tout p'tit tchoeu.”
“OK,” dit l'tatoueux. “J'm'en vais c'menchi achteu...”
Et coumme i' c'menchit san travas, Matt pensit à eune grève tropique auve du solé et des palmes..... mais ch'tait vraînment coumme des freunmions sus la pé!
Et eune d'mié-heuthe pus tard, Matt r'gardit san nouvieau tatouage dans l'mitheux d'la tatouéthie. Un tchoeu sus san tchu... un p'tit tchoeu sus l'tchu.
Viyiz étout: