Quand i' vente raide, la pé du dgiâtre,
Qu'nou ouait sûfflier dans la cheunm'née,
Quand nou-s-êcoute à l' entou d' l'âtre
Et tch'il ennyie, les longues séthées -
Tchi temps!

Quand l'temps est rude, au sé sus l'tard,
La mé comme les monts, sapresti,
Ou quand l'ponsi vole, au mais d'mar,
Qu'à cause des touâles nou chèrche l'abri -
Tchi temps!

Quand la grile tchait contre l's ôsaines,
Ou vèrglas à la breune dé niet,
Quand les nouages tcheuthent et vont quédaine,
Quand l's engoulêmes font portes hûss'ler -
Tchi temps!

Quand il en dêtchèrque à bouqu'tées
Et qué nou n'ose mett' lé nez d'houors,
Quand les êparts s'entr'-sièvent dé près
Qu' nou-s-en a peux tant qu' v'là tch'est fort -
Tchi temps!

Véthe, quand nou n'a qu' d'être abattus
Par la plyie d'ôrage à gros brîns,
Qué les grand's ieaux dêgradent les rues
Et qu' ch'la russelle avaû les c'mîns -
Tchi temps!

Et quand èrveint eune brise du s'tembre
Qu' la maison trembl'ye dé vents d'nord-vouêt,
Ou quand tout d'goutte au mais d'novembre,
Qu' les fielles pouôrrissent lé long des r'liés -
Tchi temps!

Quand ch'est d'la bliâse êpaisse, étout,
Qu' nou n' peut dgéthe vaie la main d'vant sé,
S'i' vérse d'brousse, pouor comblier tout,
Qué tout est mucre et à pité -
Tchi temps!

Quand nou r'veint comme hanneton trempé
Dé pêtchi, deux'trais heuthes à bord,
Ou qu' nou-s-enhanne par la grand' fraid,
Engliavinné, à maîntchi mort -
Tchi temps! Tchi temps!

Quand l'temps est mo, en pliein êté,
Qu' nou s'êtravelle sus l'haut du jour,
Qu' nou n'en peut pus et, d'pièrcheûseté,
Nou tchait endormi dans les chours -
Tchi temps!

Quand l'solé tape, dans la Saison,
Et tch'i' faut s'négrer dans les clios,
Ou dans l'avoût quand veint l'arsion,
Véthe, quand la c'mînse vouos cliute sus l'dos -
Tchi temps!

Tch'i' fait si caud qu'nou d'puthe dé sueu,
Et pis qu'nou craint un coup d'solé...
Qu' nou n'peut duther par la chaleu,
Qu' la s'crèche adgève tout, en êffet -
Tchi temps!

Quand pits et r'sources sont à sé,
Qu' nou met les bêtes à même lé fain,
Qu'lé p'tit d'vèrduthe tch'i' piêsse y'aver
Crève à veue dg'yi, qu' nou n'y peut rein -
Tchi temps!

Quand nou-s-a veu, pouor en bein dithe,
Touos les bénîns jours sans r'lâchi
Quatre ou chînq mais lé solé lithe
Sans un d'gout d'plyie à rafraîchi -
Tchi temps!

Quand, vents d'amont ou vents d'ava,
Lé temps tch'i' fait né nouos pliaît pon,
Quand, don, pouor en finni, ah ça,
N'împort' tchi sorte d'temps qu' j'ayons -
Tchi temps!

Quand à d's anmîns nou veurt êcrithe
Ou bein pouor entanmer du d'vis,
Ofûche s'i' n'y'a rein d'autre à dithe,
Né v'là, bouonnes gens, deux mots chouaîsis -
Tchi temps! Tchi temps! Tchi temps!

FLM