Les Pages Jèrriaises

Man Parapuie


I' broussait raide, et saprèsti,
Dans une boutique je l'avîsi ;
Il 'tait tout neu', quand j'l'acati
Man Parapuie.

Ch'en 'tait un vert, et un "dandy,"
Pas gros comme un trou d' chour vèrni
Quand j'avais l'temps d'lé bein patchi.
Man Parapuie.

Le Manche 'tait drait comme un phiezé,
La souée 'tait fine comme man chapé,
A lé r'gardé, l'monde s'arrêtait.
Man Parapuie.

Et il 'tait rond comme une topie,
Quand d' sous, - la carre, mé et Sophie
Au sé, j'faisions - au temps jadis
Man Parapuie.

Entre nous bouannes gens, il en cont'tai
Des sornettes, s'i pouvait pâsler -
Ch'la s'peut que j'lis dithais - "Tait-té"
Man Parapuie.

D'rudes bordées il a veu d'sen temps, -
D'une djaile de vent, i'y-à deus-trais ans
Une nièt je l'touanni sus les camps
Man Parapuie.

Car qu'i faiche bé, ou qu'i faiche leid
Ou qu' i faiche fraid ou caud solëit,
Jé l'porte tréjous d'jour et d'nièt
Man Parapuie.

Dans ses vièrs jours j'en prends grand soin
Y-en-à qui m'disent - "i' n'vaut pus rain"
Quand i'l'vaient la dans san p'tit coin
Man Parapuie.

Tout d'même, je n'm'en desbat'tai pon
Pus tard i'm servitha d'baton,
Man vièr amin, man compagnon
Man Parapuie.
 


CH'LA' S'PEUT

 

Viyiz étout:

 

Les Pages Jèrriaises