Né v'chîn la lettre Jèrriaise pouor Dînmanche, lé vîngt-trais dé Févri et ch’est Jill Bartholomew tchi vos pâle.
Ma fîngre, tchi temps qu'j'avons ieu dreinement!! Jé sai qu'en Angliais Févri est dêcrit coumme «lé mais dé la digue remplyie», mais la plyie dans les s’maines pâssées r'a cèrtainement 'té extrême! Et la mé est trop încriyabl’ye!! Tréjous dépis l'êfanche, j'ai 'té fascinnée par lé mouvement des mathées, mais j’n'ai janmais veu autcheune chose si spectatchulaithe dépis chînquante ans! Man point d'veue habituel est du Hâvre des Pas, et jé d'valis là un matîn y'a dans les tchînze jours pouor vaie chein tchi s'pâssait. À l'appréche du bas d'la Vèrte Rue, j'avîns jusqu’à l'Hotel du Fort d'Auvèrgne d’vant êt' arrouée! Les louêmes v'naient par-dessus la bangnérêsse et s'écrâsaient lé travèrs d'la route, tchiqu's'eunes à la hauteu dé l'Hotel Ommaroo. Auprès aver r'gardé pouor un p’tit brin, j'décidis d'aller pus liain avâu, chenna va sans dithe qué j'n'allis pon avâu la route de la côte. J'fis man c’min à travers la Rue Mathet (Marett Road) jusqu'au Long Bouët (Roseville Street), mais coumme j’tais pouor touônner à drouaite dans Roseville Street, je m'apèrchus bétôt l'ieau d’mé tchi lappait alentou d'mes pids, auvec du lanfrais et dé p’tits morcieaux des vrai à m'taper raide à la fache : absolument încriyabl’ye!! Toutefais en dêpit des avis de « route freunmée », l'înnondâtion et les mouochieaux d'vrai couochi sus la route, tchique cacheurs avaient décidé dé n'pas être enchaboté par ches’-chin et d'procéder comme d'habitude, v'là tch'încliut eune femme auvec un p’tchiot strapé dans l'driéthe dé sa vaituthe! Jé n'comprends pas la mentalité dé tchiques gens!
Assez de mes grémul’lies, ch'est l'temps d'pâsser à des choses pus positives: n'est-i' pas mèrveilleux d'r'aver des longues journées d'èrtou! J'fus êtonnée d'noter Dînmanche pâssé qué lé solé s'couoche déjà pus tard qué chîntch'heuthes et d’mie, et il est raide excitant d'vaie les preunmié sîngnes du r’nouvé tchi s’dêtâne. I’ sembl'ye y'aver d'ênormes mouochieaux de p’tite-nues partout la campangne, les pars et tapis d’vèrduthe sont remplyis d'belles jaunes et pourpres gênottes et, achteu qu'lé vent a molli un mio, dé pus en pus dé g’zettes sembl'yent appathaître. Ajouôtez à chenna qué j'allons avanchi l’heuthe en seulement chîn s'maines, alors j'espéthee que l'èrnouvé s'en va bétôt nos tchaie sus l'co; pouor bein qu’ l'hivé sait d'avis d'nos prépather du r'ta [d'aver un drein pitchet à sa coue], coumme jé l'vînmes l'année pâssée – s'i’ pliaît à Dgieu, chenna n's'en va pas arriver acouo eune fais ch't' année!!
Au sujet d'l'abat d’né du mais d'Mar d'l'année pâssée (tch'avrônit dranmatiquement nos prépathâtis) j’peux-t-i’ saisi ch't' opporteunité, souos iun de mes chapieaux parmi bein d'aut's – lé chein d'la Présidente d'la section d'Êcrituthe dé l'Eisteddfod dé Jèrri – pouor ramémouaither ès êcouteux qu’lé Festival d’Èrnouvé d's Arts Créatifs s'en va prendre pliaiche place à la Sociêté Rouoyale Agricole (RJA&HS) lé mais tchi veint. L'exhibition s'sa ouvèrte du Jeudi, le treize à Dînmanche, lé seize dé Mar, les heuthes d'ouvèrtuthe sont dé dgiêx heuthes à siêx heuthes du Jeudi au Sanm'di et dé dgiêx heuthes à quatre heuthes lé Dînmanche. Eune clâsse 'té întroduite pour les entrées d'êcrituthe îndividuelles des adultes étout, et quouaiqu'i sait trop tard pouor entrer ch’t’ année, s'i’ vouos pliaît considéthez-lé pouor deux mille tchînze.
Viyiz étout: