Si j'ein l'avais pas yieu; j'éthais tet toute trempeaie,
Car y yien veins d'la pyïe; ou duthit toute l'arleveaie,
Chu parapuïe là était en "show" dans eunne fenêtre:
Si pouvet pâslé, y dithait j'aime mus l'air que l'l f'nêtre.

Combein d'fain qu'il à sortit, chu parapuïe là,
Et pis il a tet prêtet; en veux tu, n'en v'là.
Chest kâzi êtonnant qu'il a tet ertouounet;
Souvént les gens les garde; enfein il a bein duthet.

Eunne fais j'el prêtit, à deuex "nice" jeune gens.
Ils taient engagis y n'iavet pas bein longtemps.
J'tait un piaîzi d'les vais cattineais!!! sçouos l'parapuïe,
J'lus chantit "Never mind the weather love," sitôt qui furent sortis.

J'crait bein qui n'tais pas prêssis, y faizet bieaue kié d'aistelles;
Nou sçait bein que "Umbrella Courtship" et eunne "nice" p'tite hardelle -
- Fait que l'temps se passe trop vite et y n'pensent pas à la pieïe.
Probabïément qui ftha d'la pieïe, quand y rapportethont man parapuïe.

J'entends qui yian à eunne aoutre qu'est récemment engagie;
Ou'l est tréjous contente quand le temps est à la pïeïe,
Car où dit qu'chest si "nice" et "cosy" d'être lus deuex sçouos l'parapuïe.
Y marche tout près; peut-être!!! pour aîsvité les d' goûts du parapuïe.

Mais y qu'menche à s'veillyï man bouan parapuïe,
Je crains qui ne me protègegea pas fort de la pïeïe.
Dans la dernièthe tempête, il eut eunne côte rompue;
Sans côtet étout fut triyi; un gros giand rouolit d'sus.

Y n'reste que l'wire et l'bâton; y n'yia presque pas d'sçoie d'sus
Y n'veaut rein achteu que d'être enviet dans la rue,
Où pour tchique vieir bouan homme qu'à besoin d'un bâton,
Y trouvtha la manche qu'mode, car il est oùquo bon.

Et bein n' en v'la la fein de man vieir parapuïe,
Tout dans chu monde se vieillyïe.

Georgie