Les héthondes qui tout l'êtè
M'revill'yaient d'trop bouanne heuthe,
Quand j'avais occouo soummè, -
Oùest don' qu'i'sont ach't'euthe?

Le coucou qu'les rimeurs chantent
- Plièrcheux, qui n'veurt pas couer! -
Je n'sais tchi pays qui hante,
Tch'est qu'i' vole en hiver?

Nou n'vait pus le papillon
- Qui dounne les carpelleuses! -
Il est sec - un mio d'cocon -
Muchi dans tchic cratcheuse!

Insecte et ouêsé s'en vont,
Ou s'muchent quand veint le S'tembre,
Mais pour nous, mes pouor' garçons,
J'tremblions dès l'mais d'Novembre!

J'allons être à grélotter,
Ov' l'ongl'yie touos les jours;
Et ch'la s'sa l'cas tous l'hiver...
Assez, j'ai les daigts gourds!
 

Elie

Les héthondes tchi tout l'Êté
m'revilyaient d'trop bouanne heuthe,
Quand j'avais acouo sommé, -
Où'est don qu'i' sont achteuthe?

Lé coucou qu'les rînmeurs chantent
- pièrcheux, tchi n'veurt pas couer! -
Jé n'sai tchi pays qu'i' hante,
tch'est qu'i' vole en Hivé?

Nou n'vait pus lé papillon
- tchi donne les carpéleuses! -
Il est sé - un mio d'cocon -
muchi dans tchique cratcheuse!

Însecte et ouaîsé s'en vont,
ou s'muchent quand veint lé S'tembre.
Mais pouor nous, mes pouôrres garçons,
j'tremblions dès l'mais d'Novembre!

J'allons être à grélotter,
auve l'onglyie touos les jours;
Et ch'la s'sa l'cas tout l'Hivé...
Assez, j'ai les dés gourds!