Trenton, Michigan,
U.S.A.
Lé 11 dé mar, 1967.
Moussieu l'Rédacteu,
Comme j'l'ai probabliément mentionné d'vant, nou peut s'trouver dans deux difféthents clyimats dans l'mème jour ichîn en Améthique. Un jour la s'maine passée j'tchittis un bieau solé - ch'tait comme en êté - à San Antonio, dans l'Êtat d'Texas, à sept heuthes du matîn, et siex heuthes et deux mille milles pus tard j'tais à Detroit, dans l'Êtat d'Michigan, et parmi la né. La chaleu d'êté du Texas avait 'té êchangie pour la fraid des pays du nord. Ch'tait un avion à rêaction tchi m'avait transporté si vite d'un clyimat à l'autre - dé San Antonio, Texas, à Houston dans l'mème Êtat, et pis dé là à Chicago, Illinois, et en fîn d'compte à Detroit, Michigan.
J'sommes huit fréthes et soeurs en Améthique. Ouaithe qué iun des fréthes et les deux soeurs d'meuthent au Canada, nou peut quand-mème dithe qué j'sommes tous en Améthique, car lé Canada - ouaithe qu'un tas d'gens n'lé rêalisent pon - est partie d'l'Améthique du Nord. J'sommes trais d'nous, mes fréthes Sydney et Fraînque et mé, en d'ssus d'septante, et un quatrième, nouot' fréthe John Giffard, en appréche. Lé pus janne dé nous a 57 ans, John veint d'pèrdre sa femme, et ch'tait pour aller à s'n entèrrement qué j'ai tchitté l'pays du solé d'un jour à l'autre. Ch'est la preunmié mort dans nouot' fanmile pour bein d's années, mais né v'la l'temps arrivé tch'i' faut s'attendre tch'i' y'en étha d'aut' dans l'couothant d'tchiques années l'avant à nous. Ch'est l'sort de la vie, et i' n'y a rein d'pus cèrtain dans l'monde!
Êtant à chîn' chents milles d'Ottawa, la belle capitale du Canada, quand j'tais à Detroit, j'mé decidis d'aller jusqué-là vaie ma couôsinne Hilda Selina Le Feuvre (veuve Le Gros), fille de Ph'lippe, fis Pièrre (Ph'lippe 'tait l'fréthe à ma manman), dé La Ville La Bas dans m'n êfanche. Oulle est sus l'pus à l'hôpita. Oulle appréche dé huiptante-six et a d'meuthé au Canada pour quarante ans et n'a pon ieu la chance dé pâler fort dé Jèrriais avau l's années. Ches jours qu'oulle est sans connaissance la maîntchi du temps, ch'est r'mérquabl'ye qué quand ou s'rêvilye et r'prend connaissance ch'est en Jèrriais qu'ou pâle. V'la tchi m'fait craithe que ch'est les scènes dé s'n êfanche en Jèrri tchi li travaillent l'esprit dans s'n êtat d'mié-connaissance, et les noms qu'ou' mentionne dans ch't êtat-là sont les noms d'pèrsonnes vivantes dans san janne temps en Jèrri mais tchi n'sont pus à ch't heu.
Ichîn à Ottawa, ch'est d'la né partout. Les tchéthues à né la travâlent comme s'il' 'taient à touanner la tèrre en Jèrri, et la né forme un fossé l'long du trottouaithe tch'est à six, sept et huit pids d'hauteu des deux côtés d'la rue. Quand nou cache un moto dans les rues entre ches hauts fossés-là d'né g'lée, v'la tch'i' m'fait penser ès montangnes dé La Norvége. Les routes prîncipales tchi travèrsent ches montangnes-là pour aller en Suède dé l'aut' côté sont gardées ouvertes l'hiver par des tchéthues a né, comme au Canada, et quand nou les fait servi nou-s est entre deux hautes banques dé glace et d'né.
J'tais à Ottawa au moment du décès du Gouvèrneux-Général, lé Général Georges Philias Vanier, lé preunmié Canadgien-Français à otchuper chu poste-là, et les cérémonies et spectacl'yes militaithes à l'occasion dé s'n entèrrement 'taient à bein prés comme nou les vérrait à Londres à l'entèrrement d'un membre dé la Fanmile Rouoyale. Il' tait bein aimé d'tout l'monde au Canada, lé Général Vanier. Il 'tait l'deuxième Gouvèrneux-Général natif du Canada, lé preunmyi étant Vincent Massey, fréthe dé l'acteur Raymond Massey, fanmeux dans l'cinnéma à Hollywood. Et l'Général 'tait l'preunmyi Gouvèrneux et r'présentant d'Sa Majesté la Reine tchi 'tait d'la réligion Catholique Romaine. Quand i' fut nommé, y'en avait tchi craingnaient la pôssibilité tch'i' favoris'sait l'églyise Romaine et la provînce dé Tcheubec, mais i' fut si juste, neutre et louoyal envers toutes les provînces dans toutes ses actions qué l'Preunmié Minnistre du Canada lé supplyiyit d'continnuer auprès la fîn d'sa gestion, et touos les Canadgiens ont fait preuve dé lus admithation pour li dans san vivant et d'lus chagrîn à l'occasion d'san décès.
Auve toute la né et la fraud d'touos les jours en hiver ichîn l's avions continnuent lus trajet dans l'air comme si ch'tait en êté, mais il y'a souvent du r'tard en tchittant l's aérodromes à cause dé la glace tchi s'forme sus lus ailes. Un homme monte sus eune pliatte-forme bâtie sus l'haut d'eune mannièthe d'êtchelle tchi fait partie d'un camion, et la machin'nie du camion la pousse en l'air jusqu'à qu'l'homme sus la pliatte-forme est pus haut qué l's ailes de l'avion, et pis i' les dêgelent atout un litchide tch'est pompé d'ssus à travèrs d'un tchuyau d'caoutchou par eune pompe êlectrique. Ch'est r'mèrquabl'ye qué les pilotes peuvent trouver lus c'mîn l'travèrs dé la né tchiyante et arriver tout drait ès aérodromes auve si p'tit d'avâries!
George d'La Forge
Viyiz étout: