Ah! fait i' fraid, chés jours ichin
Nou vait tout l'monde bein emboun'tès
S'n'aller couothant tout l'long du c'min
Tapant du pi'd coumme s'ils 'taient g'lès.

Et ch'n'est, de vrai, pas êtonnant:
Car ch'est l'hiver, 'ous l'savèz tous,
Qui nos apporte le mauvais temps,
R'frédeuses, halitre et mauvaise toux.

Les uns sont si enchiffrenès
Qu'ch'est à peine s'i' peuvent vos d'viser
Et occouo ch'est par dans lus nèz
Entre lus bordèes à êtèrnuer.

Au ser, ch'est des dghichons d'lait caud
Ov beurre, êpices et piéche de pain;
Des rôties d'cidre - ah! qu'il en faut
Chu mais ichin et l'mais tchi veint!

Quand veint l'heuthe de s'n'aller au lièt
Nou ouait pâler d'galots cauffès,
D'fièrs enfliubés dans du fliannèt,
Et d'joudghies d'ieau à haut portès!

Ichin et là, dans la maison,
Nou vait partout des verres et bolles,
D'sithop d'carottes, d'm'lasse ou d'oignon,
Et nou z'en mange à grand' tchul'lèes!

Elie