Au Portinfé,
Vendredi matin.
Moussieu l'Editeu,
Mais, tchi temps! Hier, le Jour de l'An, lé solé brillait comme au mais d'Avri, et la Merrienne me dit que dans san gardin tout poussait. Les p'tits ouaisiaux chantaient à lûs câssé la gorge, et j'vit deux rouogegorges tchi 'taient à s'entre faithe la cârre. Mais agniet tout est changi.
Pour vos dithe, la Merrienne et mé j'avions yeu un mio d'brit en soupant, et quand j'ramontîmes pour nos couochi, j'vit bein vite qu'ou 'tait ocquo roupilleuse. Ou m'douônit l'dos, et s'mint aussi près du bord du liet comme ou pouvait. Dans les trais heuthes et d'mie il est v'nu une bouffée d'vent tch'a châtchit la maison, épis pûs tard est v'nu chu tremblyement d'têrre tch'a fliantchi la bouonnefemme tout san long sûs l'plianchais. Ou s'est minse à faithe des brais, et, Moussieu, jamais ou n'craithais la djobbe que j'ai yeu à la r'méttre au liet. Vlà tchi y'apprendra, la vieille tétoigne, de s'êloigni d'san bouonhomme quand j'allons nos couochi. J'veins justement d'l'y porté une tâsse de tais, et ou s'pliains ocquo, mais j'peux vais qu'ou n'a pas yeu grand ma. Et don, j'ai décidé d'vos êcrithe de bouonne heuthe, pour avé tchiquechose à faithe, car y n'fait pas d'temps d's'en allé d'hors. Il est vrai que j'pouôrrais allé traithe, mais une heuthe de pûs ou d'mains ne f'tha pas grand' difféthence à la quantité d'lait tchi portent dans lûs minséthablyes piéchots.
Pâslant d'autre chose:- les Etats s'en vont bétôt siégi (je crais qu'ch'est Mardi l'treize) et j'ai veu la list d'sujéts tch'ils éthont à considéthé d'vant procédé pûs long. Y'en a dans les deux douzaines de chais projets, et l'preumyi ch'est l'sien que notre Député, le Majeur de Gruchy, présentit en chinquante-chinq pour la réorgagnisâtion d'la Milice. Y fut louogi au Gréffe, et le v'là tchin r'veint, mais de n'crais pas qu'la Chambre pérdra hardi d'temps à l'distchuté. Dans l'restant y'en a de toutes les sortes, et ch'est pûs qu'probablye que l'preumié mais pâss'sa avec prèsque rain d'fait, accordant à la couôtume usueélle chais jours. Nous entend dêjà que plusieurs membres d'Campagne ont décidé d'être extchûsés à cause de maladie au mains une fais la s'maine. Y disent tch'y sont mûs siez yeux à faithe du travas utile qu'a dormi ès Etats, et quant à mé, Moussieu, je n'les bliaume pas.
J'avais décidé d'plianté ma bordeuse de raide bouonne heuthe ch't'année, et pour bein dithe il est grand temps d'méttre mes patates en têrre, car les gérmes sont bétot un pid d'long, et ils allouognent ocquo touos les jours.
La Merrienne dit qu'ch'est d'ma faute et que j'éthais deu les laissi pûs à l'air, et oulle ajouôte que dans p'tit d'temps j'allons avé d'la né et d'la g'lée à piêrre-fendre. quand j'l'y d'mande, la vieille pihanne, tchèsqu'y y'a dit chonna, ou raipond qu'ch'est cértain car les taupes ne bouogent pas dans l'gardin, mais s'enfouaissent de pûs en pûs dans lûs nids. Je n'gâgne rain d'l'y dithe qu'ou n'est qu'une vieille imbécile. Tout ch'qu'ou raipond ch'est: "eh bein, man Ph'lip, tu vêrras". Tchèsqu'ous en dites vous, Moussieu?
Pâslant d'patates, par chein qu'j'en ouai, le projét du Sénateur Gaudin n's'en va pas réussi. ch'est drôle asséz, mais la pliupart de nos férmiers pathaissent ocquo préféthé le vier système du bridge tch'en a ruiné tant à chein que l'Sieur Gaudin propose. Ils ont peux de tchai d'la cast'rolle dans l'feu, mais je s'y pérsudé que même si ch'n'est pas ch't'année, y y'étha bétôt un change. Y y'a trop d'compétition d'nos jours pour tachi d'vendre nos patates comme nos pèthes les vendaient y'a souësante ans et pûs.
Mais, savous-bein, Moussieu, je qu'menche a avé r'grét qu'j'ai vendu mes bricolis. dépis l'jour que j'fit marchi, y s'en sont v'nûs si bein que j'vais ach'teu que j'éthais fait mûs d'les gardé. Ch'est fichant, et la Merrienne n'amende pas les choses quand ou m'dit, une douzaine de fais par jour, que j'fit une bêtise, et qu'ou n'sait vraiement pas tchèsqu'y ya donné un homme avec si p'tit d'bouonsens. J'ai s'y tenté tchiquefais d'la capuchi sûs l'haut d'la tête avec un choutchét, mais, après tout, s'oulle a ses d'fauts, la bouonnefemme, ou peut vos prépathé un bouon r'pas quand nous a faim, et pour êtuivé un lapin sauvage y n'y'a pas sa supérieure dans tout l'Portinfé. Et chonna, Moussieu, ch'est hardi, car un homme tch'aime sa mangeaille comme mé a bein d'la chance d'avé une femme tch'y peut l'satisfaithe, pas un jour ou d'même mais tout le long d'l'année.
J'l'entende tch'y crie, Moussieu, et y faut qu'j'aille vais s'ou voudrait bétôt se l'vé. Mais, sans doute, y faudra que j'l'y porte ocquo une tâsse de tais. A bétôt.
Ph'lip
3/1/1959
Viyiz étout: