Le Ménage ès Feuvres,
Lé 14 d'août, 1976.
St. Ouën.
J'soulais dithe qué les seuls hivièrs qué j'connaissais dépis tch'i' y'a eune trentaine d'années 'taient l's êtés en Jèrri. Eh bein, jé n'peux pon m'pliaindre ch't' année. L'êté, point d'veue d'chaleu et d'solé, a 'té l'êgal dé chein qu' nou peut s'attendre à vaie en Floride, lé Texas et la Califournie. Mais un vièr diton Jèrriais nouos dit qué "La valeu d'eune chose est chein qu' nou peut en aver," et l'pouorre dgiâtre d'fèrmyi, tréjous escliave à l'înjuthe du temps, n'peut qu'en aver mînséthe, dé chutte chaleu et bieau solé. Nou m'a dit qu l'hivé pâssé n'apportit pon d'plyie pour dithe, et les deux-s'trais achies du mais pâssé n'ont pon fait d'bein. Il' 'taient d'si courte duthée qué l'vent et l'solé des préchains jours èrsétchîdrent lé mio d'mucreu tch'en rêsultit. Et un aut' diton nouos dit qu' en temps d'sécréche la tèrre né crie pon à la plyie.
J'n'ai veu qu' deux ou trais cliosées d'brécolis d'chu but 'chîn d'l'Île, et nou m'dit tch'i' n's'en va pon y-aver d'deuxièmes récoltes vivant qu' la tèrre est en poudre et tch'i' faut d'la plyie pour faithe craître autcheune chose. Mais chein tchi m'fait d'la peine est quand j'ouai qu' les fèrmièrs tch'ont des troupieaux d'vaques s'en vont aver à en abattre viyant tch'i' couôte trop à les maint'nîn auve des boulets d'nouor'tuthe “chimique", car i' n'y'a pon grand nouor'tuthe pour les bestchias duthant eune sécréche dé même. Et j'ai tréjous ieu pitchi des pouôrres vaques viyant tch'i' nouos donnent lus lait toutes lus vies et qu' nou les récompensent par l's env'yer à l'abattoir !
Enfîn, l's autorités ont râtionné l'ieau. Il 'tait grand temps. Ch'n'est pon ravissant qué j'sommes à court dg'ieau quand nou considéthe lé bâtissage continnuel d'hôtels et d'maiethons et d'piscines. Et en jouôtant des chambres dans l's hôtels et pensions y'a tendance d'y mett' des bains et p'tites maîsons dans chaque chambre. Et cèrtains agritchulteurs sont à bouchi l'russé ou canné d'un but sus lus propriétés pour faithe eune êcliuse ou êtang pour faithe sèrvi l'ieau pour arrôser lus tèrres. J'ai eune idée qué ch'est contre la louai d'faithe d'ité si l'russé ou canné continnue san c'mîn sus eune aut' propriêté. Mais y'a tréjous l'pour et l'contre en louai. I' y'a probabliément des circonstances tchi gouvèrnent un car partitchulyi, comme eune affaithe dé priorité pour lé propriêtaithe qué l'russé a s'n originne sus sa propriêté. Si j'm'en r'souveins dépis ma jannéche dans La Rue ès Trais Pigeons, l's écrivains d'chu temps-là sé dgidaient hardi sus l'opinnion d'Basnage au sujet. Érvénant à nouos jours. l'Avocat Charles Sydney Le Gros (pus tard Vicomte et Lieut'nant Bailli) dans l'chapitre întitulé "De l'Eau” dans san livre "Traité du Droit Coutumier de l'Île de Jersey” tchi pathut en 1943, en donne un supèrbe rêsumé tchi vaut la peine d'étudier. Moussieu L'Gros donne des précédents, et ch'est hardi întéréssant à liéthe.
I' n'y'a pon d'doute qué l'ieau est aussi nécessaithe à la vie d'l'homme comme à la vie des récoltes tchi lî souotcheinnent lé dos. J'avons grand bésoin d'l'ieau du Ciel. Nouos vièrs ditons soulaient nouos donner eune raide bouanne idée du temps à v'nîn l'lendemain. Y'avait, par exempl'ye, lé chein tchi nouos disait: "Lé Ciel est vèrrin - j'avons d'la plyie !” D'autres : "Y'a d's appias au solé, ch'est sîngne dé plyie!" : “quand eune âne brait, ch'est singne dé plyie !” : " quand les pièrres mucrissent (en d'dans) , ch'est sîngne dé plyie !”: " les bibets sont dêhalés, ch'est sîngne dé plyie!” : "des vents d'sud, quouaiqu'i' n'tchaie pas d'plyie - prannez tréjous vouot' paraplyie !" : "quand l'solé pâsse dans l'ieau, ch'est sîngne dé plyie!” : "quand la plyie d'pâsse méjeu, toute la journée i' plieut!” (Chu diton-là m'fait penser au temps qu' j'allais au Thée d'l'Êcole du Dînmanche quand j'tais mousse. J'attendais fête à chu jour-là toute l'année, et pis quand il arrivait i' tchivait d'la plyie. Papa savait l'diton et mé l'dîsait, et J'pèrdais toute espéthance s'ou continnuait eune minnute pâsse méjeu !
D'aut' ditons nouos disent : “Quand les cos chantent, ch'est sîngne dé plyie!” : “pie tchi crie, ch'est sîngne dé plyie!” : " sîngne dé plyie quand nou ouait L'Port! (L'Port est eune partie des Grèves dé St. Ouën - ch'est quand la mé y travâle) : “lé solé est blianc - sîngne dé plyie!”: “quand l's alouettes lus piquent (au vol), ch'est sîngne dé plyie!”
J'pouôrrais continnuer les ditons, mais i' faut qu' j'm'arrête. Nou peut dithe qué j'avons veu hardi dé ches sîngnes dé plyie à ches drein, mais tch'i' n'ont pon donné l'rêsultat voulu. Et connaîssant un mio la natuthe des gens en Jèrri d'nouos jours, j'n'avais pon grand' fouai qué la d'mande des autorités dé couoyer l'ieau volontaithenient éthait l'rêsultat voulu. Lé rationnement m'pathaît don nécessaithe et i' faut faithe dé nouot' mus pour y donner êffet et n'oublier pon qué l'ieau r'lave tout sinon nouos péchés!
Viyiz étout: