Y'a des gens tchi sé d'mandent pourtchi qu'j'avons l'mot "p'tun". En Français l'mot est "tabac" et en Angliais nou dit "tobacco", mais j'avons chu mot tchuthieux. Dé ioù tch'i' veint?
L'mot "petun" vînt d's Îndgiens Tupi du Brési, et fut apporté en Ûrope au seizième siècl'ye par les navidgants et marchands Portûndgais. Les Français empruntîtent lé mot tchi continnuait à exister bein longtemps en ancien Français avant dé dispathaître - et né v'chîn coumme tchi qu'lé mot arrivit en Jèrri où'est qu'j'l'avons gardé jusqu'au jour d'aniet.
En Brétangne, les Brétons ont l'mot "butun" tch'a la même originne qué not' mot. Mais, si nou r'garde dans un dictionnaithe Français, nou n'trouv'tha pon l'mot "petun", tch'a dispathu du Français modèrne.
Même si nou-s'est contre la drogu'thie, nou dait r'mèrtchi l'histouaithe et l'înfluence des drogues sus les gens et la tchultuthe - si ch'est qu'nou-s'êtudie l'alcool, ou lé p'tun, ou lé cannabis ou l's aut's drogues. Les gens ont tréjous ieu la couôteunme dé s'drodgi et ch'est înmportant dé saver pourtchi - sustout si nou veurt les pèrsuader d'èrnonchi.
Temps pâssé ch'tait lé sno tchi 'tait l'mouoyen l'pus populaithe dé prendre lé p'tun - et chenna bein avant l'învention des cigarettes.
La preunmié poésie en Jèrriais qué j'avons ach'teu est un but êcrit par Matchi L'Gé et daté 1795 entouor l'marchand dé p'tun Simonet tch'avait eune boutique bein connue à Saint Hélyi.
"Si quicun veut du sno, bon, frais, fort, bain râpait,"
"Y ly faut l'acaté siés Mousieu Simonet".
Y'a eune histouaithe entouor lé Général Don tchi construîsit les grandes routes militaithes dans l'Île. Les gens n'voulaient pon donner lus tèrres pouor la construction des routes et l'Général rencontrit d'l'opposition à ses plians. Eune vielle danme n'voulait pon qu'nou prenge sa tèrre, mais l'Général lyi offrit eune pînchie dé sno et la vielle danme dêcidit qu'i' n'tait pon un si mauvais bouonhoumme auprès tout.
Aut'fais i' n'tait pon considéthé vraînment respectabl'ye pouor les femmes dé snotchi - sustout pouor les jannes fil'yes. Et don les cheinnes tchi s'adonnaient à la snoqu'thie soulaient snotchi en s'gret.
I'n'y'avait autcheun problième d'même pouor les hoummes dans les jours quand i' 'tait tout à fait respectabl'ye et mastchulîn dé feunmer.
Nou peut liéthe dans les colonnes des vielles gâzettes, d'la Nouvelle Chronique de Jersey et des Chroniques de Jersey, qu'nou-s'y'avait eune boête à sno sus l'compteux pouor en offri eune pînchie ès vîsiteurs quand i' v'naient à l'office.
Ach'teu la feunm'thie est întèrdite dans la puspart d's offices et nou peut vaie les feunmeurs - ou nou pouôrrait dithe à la vielle mode "des p'tunneurs" - à feunmâtchi dans la rue en d'hors d'lus pliaiche dé travas.
Les cigarettes sont taxées bein dû à seule fîn dé dêcouothagi les gens d'feunmer pa'ce qué ch'est bein mauvais pouor la santé - la santé du feunmeux ou d'la feunmeuse et pouor les cheins à l'entou étout. I' n'est pon pliaîsant d'pâsser eune séthée dans eune atmosphéthe enfuntchie!
Quand George d'la Forge vîsitit l'Unnion Soviétique duthant l's années septante, il approuvit d'la manniéthe coumme tchi l's autorités là-bas êprouvaient d'arrêter la feunm'thie.
Mais i' faut dithe qu'i' n'est pon aîsi d'rêduithe eune pratique coumme la feunm'thie dans eune sociêté démocratique coumme chette-chîn qué j'avons en Jèrri viyant qu'i'y'a acouo tant d'gens tchi veulent faithe sèrvi du p'tun pouor sé drodgi.
Les cheins tch'aiment bein les pliantes et les flieurs et l'gardîngnage connaissent bein les petunias. Ches pliantes-chîn sont d'la même fanmil'ye qu'lé p'tun, les tonmates, les patates et l'vèrjus au dgiâbl'ye. Si nou r'garde lé nom du petunia, nou vaie l'mot "petun" d'dans. Chutte flieur vénue d'l'Améthique èrchut san nom d'sa pathenté auve lé p'tun s'lon les dictionnaithes.
Mais nou dait dithe qu'les petunias sont bein pus jolis qu'la p'tunn'nie, n'est-che pon?
Geraint Jennings
Janvyi 2001
Viyiz étout: