Le gros All'mand, que John Bull n'aime pon trop,
Mange raidde de gh'va et d'vise dans san gôsi;
I' bétha des pots d'biéthe!...
- Si ch'tait mé, j'en s'sais d'piéthe! -
Sa pipe en terre est grosse coumme un bouan broc
Et nos briqu'thies ne fument pas autant qu'li.
Mais dounnez mé ma pipe
Et passez mé man mogue!

L'Angliais qui veint en Jerry dans l'Etè
Pour se proum'ner et faithe un mio d'san tchan,
Qu'nou vait a toutes les carres,
A fumer des cigares,
N'a jamais yeu, n'importe y'où qu'il a 'tè,
Autant d'pliaisi coumme mé, pouorr' vièr pêq'than,
J'en ai ov man gros mogue,
Et ma pipèe de p'tun!

Es grand' tchéthues, un verre de grog est bon,
V'la qui rêcauffe et vos r'baille un mio d'tchoeu,
- Et nou n'en est pas d'piéthe,
Quand i' fait une fraid naithe,
Mais, pour ma part, y'où qu'j'aime le mus m'trouver
Ch'est dans ma tchaithe, trantchill'ment, à m'cauffer
Avec ma modghie d'cidre,
Et ma pipèe de p'tun.

A les r'garder, nou n'en craithai pon rein
Des deux objets qui m'sont si près du tchoeu!
Un êtrangi, sans doute,
Un passant sus la route,
Si' les viyait, je crai, s'en fich'chait bein
Mais pour de mé, assis a man coin d'feu,
Ah! dounnez mé man mogue
Et laissiz mé ma pipe!

Elie