En 2007 j'allons êt' mains enfuntchis - même les cheins d'Grouville et St. Cliément! Ch'est en tchi d'pis l'2 d'Janvyi nou n'est d'aut' pèrmîns en Jèrri d'feunmer dans des pliaiches couèrtes où'est qu'nou travâle. Les feunmâtcheurs éthont achteu à aller hors mais i' daivent lus mêfier en prannant lus pliaîsièrs à p'tun car lé Connêtabl'ye dé St Hélyi a dgèrni qu'i' faut pon laîssi tchaie des buts d'cigarettes dans les rues d'la Ville.

Pouor achteu les feunmeurs peuvent lus êcapper en France car la louai contre la feunm'thie c'mench'cha raîque au mais d'Févri 2007 (et l's aubèrges et les restaurants éthont jusqu'au mais d'Janvyi 2008 pouor l'arrêt d'la feunm'thie). Les Gallouais et l's Irlandais du Nord siéthont au mais d'Avri 2007. Épis i' n'y'étha pon d'êcappe en Angliétèrre nitout car la louai tchi condamne la feunmâqu'thie dans les pliaiches publyiques étha san jour appouainté au mais d'Juilet 2007.

Véthe, la feunm'thie es'sa bétôt sus l'pavé, sus pus d'un sens, mais si Messire Ouâlteur Ralegh s'sait d'èrtou en Jèrri auprès quat' chents ans, tch'est qu'i' dithait? Ouaithe qué chu moussieu n'fûsse pon l'preunmié à întroduithe la feunm'thie d'l'Améthique, il en lanchit la mode à la cour Angliaîche. S'i' 'tait acouo l'Gouvèrneux d'Jèrri, j'n'éthêmes pon d'louai d'même, valet.

Si les feunmeurs sont chassés hors, dans nos aubèrges y'a-t-i' ni feu ni feunme ni pèrsonne tchi l'alleunme? I' n'faut pon rempliaichi la feunm'thie dans l's aubèrges par la freunm'thie d's aubèrges. Nou peut achteu baithe eune fais sans ristchi à aver à laver touos ses habits. Eune résolution don pouor les cheins tchi souôtcheinnent la nouvelle louai s'sa d'aller pus souvent ès aubèrges en 2007. Santé!