Lé preunmyi à êcrithe en JèrriaisMatthieu Le Geyt - Matchi Lé Gé
Ch'fut Matchi L'Geyt tchi, l'preunmyi, s'mînt à faithe des vèrsets en Jèrriais. Il 'tait d'St. Hélyi, mais i' dut d'meuther à La Trinneté pouor tchique temps étout. Il avait 'té Vingt'nyi, et probabliément avait otchupé d'autres postes dans sa vie. Matchi fut né au mais d'Août, 1777, et fut bâptîsi dans l'églyise dé St. Hélyi. San péthe, Matchi étout, 'tait Cap'taine dans la Marinne Rouoyale, mais Matchi l'fis fit san sèrvice militaithe comme troûpeur, gângnant l'rang dé Lieut'nant. I' r'vînt en Jèrri et sèrvit dans l'Régiment du Nord et dans l'Êtat-Mâjeur dé la Milice, sa commission datant du douzième Septembre, mil huit chent six.
Matchi mathyit Raché L'Couteur, et il' eûtent au mains un fis, Ph'lippe, qui mouothit à l'âge dé sept ans en mil huit chent seize. Nou peut vaie un tombé, près d'la muthâle au vouêt dé l'églyise dé St. Hélyi, êrigi par Matchi et Raché en mémouaithe dé san péthe Matchi et d'san fis.
Lé récensement militaithe du Général Don montrit qué d'vièrs mil huit chent treize, Matchi démeuthait dans la Vîngtaine du Mont à l'Abbé, mais en mil huit chent trente-sept i' payait l'rât dans la Vîngtaine dé La Ville. Dans eune Assembliée des constituants du Connêtabl'ye dé la pâraisse dé St. Hélyi, jeudi lé vîngt-tch'ieune dé Févri, mil huit chent trente-neuf i' proposit l'augmentâtion des Êtats, et qué douze r'présantants s'raient êlus par les pâraisses comme adjoints des Connêtabl'yes. Matchi mouothit lé quatre Juillet mil huit chent quarante-neuf à l'âge dé septante-tch'ieune ans et onze mais dans sa maîson à Lemprière Street. S'lon "La Chronique" i' tait Lieut'nant-Coronel et Înspecteux d'Artill'lie dé la Milice, et i' laîssit "des souvenirs honorables chez tous ceux qui l'ont connu".
I' composait en rînmes entouor la politique pûtôt, et ch'la au c'menchement du dgiex-neuvième siècl'ye. I' rîmait et êcrivait d'bouôn Jèrriais, mais i' sembliéthait qué, ouaithe tch'i' dûsse aver d'l'êducâtion, i' n'sé s'sait pon gêné d'l'êpelage quant au Jèrriais. Mais i'faut sé souv'nîn qu'lé Jèrriais n'tait pon acouo standardisé.
Matchi Lé Gé 'tait d'la même êpoque qué Georges Métivier dé Dgèrnésy (1790 - 1881). Bein d'aut's auteurs et poètes Jèrriais et Dgèrnésiais les suivîtent, mais ch'fut tchique temps d'vant tch'i' y'eûsse eune telle explosion d'littéthatuthe sembliabl'ye dans l'Cotentîn. I' sembliait qué ch'tait Georges Métivier dé Dgèrnésy tchi 'tait lé tout preunmyi à êcrithe dans l'Nouormand des Îles. Chutte crianche fut fondée sus la date, lé deux d'Octobre mil huit chent onze, tchi suivit lé titre dé "Dialogue entre Jeanneton et Nainai, des Paraisses de Ste.-Marie et St.-Ouen, le 2 Octobre 1811. Chutte pièche attribuée à Matchi L'Gé est la traîsième dans l'livre "Rimes et Poësies Jersiaises" publié par Abraham Mourant en mil huit chent souaixante-chînq. Nou criyait qué la preunmié pièche dé Georges Métivier 'tait "Toumas Nicolle", censée êt' êcrite en mil huit chent chînq.
Mais l'Sieur Anthony Scott Warren a fait des r'chèrches qui prouvent qu'les Jèrriais, tréjous prêts dé s'montrer mus qu' les Dgèrnésiais, peuvent èrcliâmer l'honneu d'aver ieu un auteur tchi 'tait lé tout preunmyi à êcrithe dans l'Nouormand des Îles. S'lon "L'Anmîn Flippe" dans la gâzette "La Voix des Îles" du quatre d'Octobre mil huit chent septante-trais, ch'tait Matchi Lé Gé qui 'tait l'tout preunmyi. Quand les lîngnes tchi siêthent fûtent êcrites, Georges Métivier n'avait qu' chînq ans:-
"Si quicun veut du sno, bon, frais, fort, bain râpait,"
"Y ly faut l'acaté siés Mousieu Simonet".
(MATTHIEU LE GEYT 1795 )