Oulle 'tait bïanche comme une nêh, longue comme lé bras.
Quand j'p'tunis d'dans, un Mardi Gras,
La prumié fais siez Jim Le Cras -
Ma "Churchwarden".

Et sus m'n'aîs d'foyé pour bein longtemps,
J'la gardis d'charme sans accidents,
Et touos les sïêrrhs jé fumais d'dans -
Ma belle longue pipe.

Mais au coin d'l'âtre j'tais une séthêh,
J'fumais èt j'hoûtais par bordêhs.
Pus d'giëz faïs j'l'avais raluméh -
Ma longue neuve pipe

Ma femme m'criyis - Eh ! va t'couochi!
Jé trésautis; souos l'grêe ou' tchit,
Et en treïs morciaux j'la bûchis -
Ma pouorre longue pipe.

V'là tchi t'sert bein! chez chein qu'om dit,
Mais philosophe un p'tit mio j'sis,
Et j'les r'jueinyis sans prendre d'avis -
Mes morciaux d'pipe.

Les deux longs buts, dans l'feu j'fiantchis,
J'eus un bouan "smoke" dévant m'couochi
Et ché fut d'même qué j'quémenchis -
Ma court-é pipe.

Combein de pipêhs qué j'ai fumêh!
Combein d'chents milles qu'j'avons trav'lêh!
D'pis chu temps-là, de jour èt d'nïêh -
Ma court-é pipe!

Un jour, j'têmes à la grand' tchéthue,
Siez Ph'lip Lé Bro, près les Sièz Rues,
Ou vint bein près d'être bein fichue -
Ma court-é pipe.

Deux garçons avait Ph'lip Lé Bro,
Ils 'taient tréjous à faithe tchique dro,
I' n'mantchîdrent pon dé m'jouer un touo -
Avec ma pipe.

J'eus une aûtchie après diné,
J'enn' la fumis qu'à la meintché,
Et pis j'la mins sus l'ais d'foyé -
Ma court-é pipe.

Auprès du feu, en un troupé,
J'têmes touos assis après soupé,
La prumié chose ché fut d'happer -
Chât'chun sa pipe.

J'enn' pensions à aut'chune frédeinne,
Et j'fîmes chanter men couôsin "Dan",
Et comme un prince j'fumais la meinne -
Ma court-é pipe.

Fû-utt - BANG!! J'pensis qu'ma tête 'tait horte,
Janmais j'n'avais veu rein d'la sorte,
Ou volit d'l'âtre jusqu'à la porte -
Ma court-é pipe.

Comme êtenpêrrche j'restis assis,
Lé nêzh brûleh, la barbe odrie,
Dé poudre il' l'avaient presque empyîe -
Ma court-é pipe.

Sus l'but du nêzh j'eus une vessie,
J'lé poussotis èt i' s'r'fit,
Mais d'pis, tréjous, jé m'en mêfis -
D'ma court-é pipe.

Une autre bordêh d'la Ville j'r'venais,
Sus l'haut d'une "bus" à Mess Benest,
Et comme de couôtume j'la fumais -
Ma court-é pipe.

Quand j'vinmes près d'la "Folie Balleine",
J'sens d'tchi qui brûle! Ch'est comme d'la laine;
M'dit Charles Rose dans une haleine -
Ch'est p'têtre ta pipe ?

Au même moment, mié suffotchi
Jé mé trouvis; d'but jé m'pitchis
Et dans mes pôtes m'mins à cherchi -
Ma court-é pipe.

Et pis, don, l'monde dé mé ghrîgnaient.
Car oulle avait - sâbre-é dé boïês -
Mins l'feu à ma pouchaïtte dé brêes -
Ma court-é pipe.

Ch'est drôle qué j'n'l'ai jamais bûchie,
Jé dis tchique fais à mes amis,
Ch'est comme les cats, oulle a sept vies -
Ma court-é pipe.

Quoïqu'ou sait neithe comme un trépied,
Et à pé près longue comme lé deï,
Par meï, par terrh, ah! donnêzh mé -
Ma court-é pipe

Quand i' gêle dü, qui feït si freï,
Qu'tout l'monde ont l'oïêzé à rouoge bé,
Rein m'garde lé nêzh bein caud comme yié -
Ma court-é pipe.

Et l'êtéh quand j'vais au baté,
Ou qu'à basse yïeau j'vais pêcoter,
Jamais j'enne' manque de l'emporter -
Ma court-é pipe.

Souvent quand j'sis rentrèh lâssêh,
Par les affaithes, l'esprit badrêh :
Mille diffitchultêhs j'ai gav'lêh -
Fumant ma pipe.

Veithe d'ja, j'sommes grands amis nos deux,
J'la gardéthai longtemps si j'peux,
Ach'teu ou vos fait ses ad'jieux -
Ma p'tite doûdine, ma court-é pipe.

"CH'LA S'PEUT"