Les Pages Jèrriaises

LA CIGARETTE


Duo.
AIR A VOLONTÉ

N'feunmez pon!

Basse:

Tch'est qui vaut deux sous l'patchet
Et que j'mets ov man mouochet
Dans la paute de man blianchet?
Ma bouanne Cigarette.

Soprano:

Tch'est qui t'couôte un tas d'coppeurs,
Qu'tu f'thais bein mus d'mettre ailleurs,
En cas qu'j'éthions des malheurs?
Ta boustre d'Cigarette!

Basse:

Quand j'ai fini man dîner
Tch'est qu'ch'est qu'j'aime à dêhaller,
Tout d'un coup, pour l'allumer?
Ma bouanne Cigarette!

Soprano:

Quand tu'as mangi tan podin,
Tu f'thais mus d'être dans l'gardin
Que d'être à fumer ichin
Ta fichue Cigarette.

Basse:

Et quand j'sis siez nous au ser,
Et qu'ma femme est à r'pather,
Tch'est qu'jé sis content d'fumer?
Ma p'tite Cigarette!

Soprano:

Quand ta femme les mains dans l'ieau
Est à laver les vaissieaux
Tu fumes, plièrcheux, les yeux clios!
Ta vilaine Cigarette!

Basse:

Quand j'men vais à man travas
Trantchill'ment, ov man pagas,
J'lai tout l'temps, ou n'me tchitte pas
Ma chiéthe Cigarette!

Soprano:

Ah! dame, oui! ch'la pathaît bein
D'vaie un grand babaine qui s'tcheint
A fumer pour ne faithe rein.
Ah! ches Cigarettes!

Basse:

Tch'est qui jaunis l'bu' d'mes daigts
Met la couenne coumme du chamouais
Qu'nou dithait que j'la peindrais?
Ma p't'ite Cigarette.

Soprano:

Ou z'enfumâtchis les gens,
Tout n'est qu'fumée par dedans,
Et ch'est la "spittoon" tout l'temps:
Ov votr' Cigarette!

Basse:

Tch'est qui brûle à raiddé-brache
Et qui m'enfumâque la fache
Tralant même man mio d'moustache?
Ma p'tite Cigarette!

Soprano:

J'voudrais qu'ou vos brûl'thait l'nez
Car de vrai, j'en ai assez.
J'm'en ithai s'ou persistez,
Ov vos Cigarettes,

Basse:

Tch'est qu'tu r'as dans la caboche,
Tu'es jalouse, es-tu, ma douoche,
Chaque fais que j'porte à ma bouoche
Une p'tite Cigarette?

Soprano:

Vaithe, et je l'dis, n'y'a pas d'run,
Ichin d'dans, pour femme et p'tun,
J'ai un houmme, j'n'en veurs que yun,
Mais pas d' Cigarettes!

Basse:

J'sai' bein qu'tu'as tréjous raison
Et tu f'thas coumme tu crai' bon.
Mais pour mé, je n'tchittait pon
Ma vielle Cigarette.

 

ELIE
Sept., 1911

 

N'feunmez pon!

 

Viyiz étout:  

Les Pages Jèrriaises