|
Ou m'arrêtit. Pouortchi? J'fus-t-i' surprîns! Janne et gênante, affrontée coumme eune b'lette, Et v'là ou mé d'mandit chutte tchestchion-chîn: “Té pliaît-i' m'acater des cigarettes?” La feunmâtcheuse m'adréchit à matîn; Lé feu fut satchi et ouaithe qué nou dgette Pouor la brigade, j'n'acceptis pon l'bardgîn: “Té pliaît-i' m'acater des cigarettes?” Et a-t-alle caûffé man tchoeu même un brîn? Nânnîn, man pôqueur est bûchi en miettes. Ma rêponse: “Nânnîn-dgia, ma garce, nânnîn.” “Té pliaît-i' m'acater des cigarettes?” Geraint Jennings 11/2/2004 |
Viyiz étout: