Moussieu l'Editeu,
Ch'est drôle assez, mais je n'pouvons jamais accordé, la Merrienne et mé. J'n'ai qu'à dithe tchiquechose, et ou m'contrédit.
Hier au sé, par exemplye, je r'mertchit qu'chutte dame-là en ville tch'y veur dithe que les femmes éthaient ben pûs d'chance d'entré dans l's'Etats si l'enviyaient l's'hommes hors-bord, se trompait grandement.
"Ch'nest pas vrai," ou s'fit. "Oulle a grand' raison. Et si les femmes n'taient pas si bête, nou verrait bétôt un changement. Pour d's'années et d's'années, l's'hommes ont gouverné, et y n'ont fait qu'des bêtises."
"Ah, êcoute, Merrienne," j'l'y dit. "Tu n'dev'thais pas pâslé d'même. y n'ont pas fait tant pièthe, après tout. e'rgarde à qu'menchi notre Comité d'Agritchultuthe, tchêsque ils ont fait pour les fermiers. Les femmes n'en éthaient jamais fait autant."
Mais v'la tchi n'l'y pliut pon. "Ne m'pâsle pas d'chu Comité-là," ou dit, "parsque tu me f'thas enragi. Y sont les pièthes du lot, et ch'là ch'est dithe tchiquechose."
"Mais, enfin, ma pouôre Merrienne," j'l'y dit, "tchêsque les femmes f'thaient sans l's'hommes, dis-mé chonna?"
"Quant à mé," ou raiponit, "je s'sais ben contente d'en être dêfaite."
"P't'être ben agniet," j'l'y dit, "mais tu n'pâlais pas d'même quand j'allais t'faithe la cârre dans notre jeune temps. Tu tais tréjous la preumièthe dans la ruétte au sé."
"Dans chu temps-là j'n'avais pas d'avis," ou dit, "mais j'ai apprint. Une fille tch'y s'mathie s'met dans la minsèthe."
"Oh, ch'est d'même," je m'fit. "Et êst-che pour chonna qu'tu'as tréjous tait si prêssie d'mathié tes filles? Y m'semblye que ch'est un drôle de raisonnement."
La bouonnefemme se l'vit. "Je n'gâgne rain d'argumenté ôv té," ou dit séquement. J'm'en vais m'couochi, mais d'main j'm'en vais y'êcrithe à chutte dame-là, pour l'y dithe qu'ou s'sa seûze, d'au mains une vouaix dans la pâraisse de Saint-Ou le jour qu'ou s'mettra sûs les rangs pour Juré Justicier."
Ph'lip
Viyiz étout: