Aigre, en Charente,
France.
Lé 12 septembre, 1970.
J'veins d'penser a tchiquechose tchi pouôrrait p't êt' t'aidgi à t'en dêfaithe, dé t'n amouotheuse, et v'la tch'i' né f'thait pon d'ma d'l'êprouver! As-tu un portrait d'té-mème, desinné à ches drein? Nannin? Eh bein, va-t-en en ville démain t'faithe dessinner. Et pis env'yis l'portrait à la janne fille tchi veurt té mathier! Dis au dessinneux dé t'faithe un bieau grand portrait, et d'n'aver pon d'peux dé t'faithe pathaître bein naturel. J'crai qué quand ou r'chév'tha chu portrait-là t'laîs'sa trantchil!
Amice èrgardit Papa drôlement, et pis i' lî dit : Mais v'la tchi la f'tha vouler v'nIn acouo pus vite, si j'env'yis man portrait!
J'crai qu'ché s'sait l'contraithe, mé, Papa lî dit. Et à m'n idée, v'la tchi vaudrait la peine d'êprouver!
Eh bein, jé n'comprends pon tch'est qu'tu'as dans l'idée, Amice dit à Papa. Sénon pour ma barbe, j'n'ai pon changi fort. J'ai tréjous 'té un bel homme mais, enfîn, j'sis prêt à êprouver autcheune chose!
Èrgardes dans l'mitheux!, Papa lî dit, et v'la tchi dév'thait t'aidgi à comprendre mus! Mais n'èrvéchîn Ann, et il est temps d'aller s'couochi. Tu r'veindras nouos dithe tch'est tch'en est quand tu r'éthas des nouvelles!
Eune semaine pus tard, né v'la Mess Pipet tch'arrive atout san portrait, et i' d'mandit à Papa d'lî-aidgi à êcrithe eune lettre pour l'env'yer à sa janne fille. Tu t'èrconnais à êcrithe comme i' faut, té, i' dit à Papa. Aigues-mé à êcrithe un tas d'tchi sans dithe rein!
I' finnîdrent par êcrithe tchiquechose comme chennechîn : En rêponse à tes trais dreines lettres, i' faut qué j'té diche qué j'ai grand r'gret, mais jé n'peux pon t'înviter à v'nîn passer tchînze jours siez mé car j'ai acouo man n'veu et ma nièche, et les vaîsîns n'ont pon d'run. Comme tu m'as d'mandé si j'sis acouo si bieau garçon comme j'tais y'a trente ans, né v'chîn man portrait. Tu vèrras qué j'n'ai pon changi fort dé fache, mais j'sis accâblié d'rhonmatisses, et j'sis souos les mains du docteu.
Mess Pipet n'était pon trop rasseûthé, mème auprès qu'la lettre fut êcrite. Ch'est seux qu'man portrait s'en va la faithe vouler v'nîn par lé préchain baté, i' dit à Papa, et i' fallut deux-s'-trais vèrres cauds pour lî donner l'couothage dé l'env'yer!
Manman n'tait pon trop contente à Papa. Avais-tu bésoin d't'en méler?, ou' lî dit quand Mess Pipet s'en allit. I' dév'thait s'mathier, l'vièr Amice. Touos l's hommes dév'thaient lus mathier!
Ch'est drôle, Papa li dit, mais eune femme né peut pon souffri d'vaie un homme heutheux!
Bon!, Manman lî dit, tu n'est pon heutheux, don, té?
Si-fait!, Papa lî dit, mais i' n'y a pon eune aut' femme comme té, et Amice Pipet n'peut pon t'aver, d'pis qu'ch'est mé tch'a ieu la chance!
La préchaine fais qu'Mess Pipet vînt nouos vaie, il avait l'air tout abattu, et i' pathaIssait êpeûthé. Oulle a r'chut man portrait, i' nouos dit, et né v'chîn sa lettre!, i' dit à Papa en lî donnant à liéthe :-
Man chièr pétit doux, jé n'sai pon comment qu'tu peux jouer des farces dé mème à ta vielle amouotheuse! Dans ta lettre tu m'dis qu'tu'est à m'env'yer tan portrait, et pis quand j'l'ai r'chu j'ai trouvé qué ch'tait l'portrait d'Papa Noué qu'tu m'as env'yé! J'en ai ieu d'la peine, car j'attendais fête dé r'vaie ta fache et pis ch'tait l'portrait d'un vièr homme qué j'ai veu! Ch'est seux qu'tu'avais acaté l'portrait d'Papa Noué pour lé donner à tchique mousse pour san Noué, et pis tch'i' s'est trouvé mêlé parmi tes portraits et qu'tu m'l'as env'yé par mêprînse! Env'yis mé don tan vraie portrait!
Manman avait d'la peine à s'empêchi d'rithe quand Papa liut la lettre en haut, mais ou' mênagit d'n'en faithe pon la minne, et ou' dit à Mess Pipet : Mais oulle a raison, chutte pouorre fille. Ou' n'éthiez pon deu lî jouer eune farce dé mème - dé li-env'yer l'portrait à Papa Noué à la pliaiche du vôtre!
Amice 'tait comme un fo! J'n'ai pon joué d'farces a personne! i' s'fit. Et tu l'sai bein, té, George! Ch'est d'ta faute qué j'env'yis man portrait! i' dit à Papa. Ch'est eune însulte dé m'appeler Papa Noué. Ou' dév'thait aver honte. Eune femme à s'n âge, étout!
Mais, i' n'faut pon vouos mârri d'mème!, Manman lî dit. Ch'n'est pon d'sa faute, à vouot' janne fille, s'ou' lî'avez env'yé l'portrait d'Papa Noué par mêprînse!
J'criyais qu'Mess Pipet s'en allait affoler!
Mais, êtes-ous à vouos fichi d'mé?, i' dit à Manman. Ou' savez bein qu'ou' dait saver mus, chutte femme-là! Ch'est man portrait qué j'li'ai env'yé! Est-che dé ma faute s'ou' m'prend pour tchitchun d'autre? I' faut qu'ou' s'sait aveugl'ye! Mess Louothains, l'dessinneux en ville, mé dit qué ch'tait un si bouan portrait d'mé tch'il allait l'mettre en grand dans la f'nêtre dé sa boutique pour qué touos les St. Ouënnais piêssent mé vaie châque fais tch'i' passent par-là!
Ch'est l'amour tchi la mînse aveugl'ye!, Manman lî dit. Ou connaîssiz bein l'vièr diton!
Viyiz étout: