Moussieu Samuel et mé, j'passîmes la séthée ensembye. l'aut' sé. Pépée 'tait hort a eunne reunion pour Ne pas Taxé la Biethe, et mémée a eunne Reunion pour Empèchi les Servantes d'avé des galants ; et Moussieu Samuel avait promins a mémée d'resté m'aidji a dèsvié du vigonia pour faithe des cotillons ès négresses des pays cauds.
“May I smoke?” qué m'dit Moussieu Samuel. Et quand j'y'eut dit qu'j'aimais hardi l'odeu de p'tun, i' dèshalli un grand long cigare Amethitchin qu'avait couoté, qui m'dit, trente sous, et l'mint dans la carre de sa bouoche, la pointe en haut, coumme Moussieu Journeaux quand il est a jugi les bêtes a Moussieu Pérrée, et qu'les autres juges ne sont pon de s'n'avis.
Je d'visimes d'choses et d'autres : d'la Taxe sus l'Tée : du prix du beurre : du dernié sermon sus la condite des filles dans la rue d'drièthe : et d'eunne nouvelle race de poules qui pounnent des oeus carrées. Et pis j'nos minmes a pâslé des Suffragettes. Moussieu Samuel s'y counnait la d'sus. I' liét un tas d'gazettes ; et i' counnait toutes les morgaches de chès femmes la coumme s'i' l's'avait veues.
Quand i' vint a m'dithe qu'y'en a qui d'pichent des ozennes de boutique, qui flianquent d'la booe sus des messieux, qui versent de l'encre dans les bouetes-a-lettres, et qui brulent des maisons : j'n'en r'venais pas ! Et pourtchi qu'chès souépinnes la font ditét Moussieu Samuel ? que j'lis dis. 'Pas'-qué nou n'veurt pon les laissi voté dans l's'Assembliées d'Paraisse,' qui m'rèspounni.
J'n'en r'venais pas ! de tout ch'que Moussieu Samuel me dit sus les Suffragettes. Des femmes qui passent lus temps a buchi tout, a marchi 'up-an-down' dans les rues en hurlant, a envié des pierres a travers les f'nètres et a faithe les chent coups partout !
Et pourtchi que l'Gouvernement n'les met pon en prison, chès dèsvergondées la ? que j'dit : pourtchi q'nou n'les punit pon pour être a galvaudé les qu'mins, a la plieche d'être siez yeux a èspousté lus meubye ? - ou a dèsvié du fi ov un naice jeunne houmme ? que j'dit, en rappréchant ma tchaise de Moussieu Samuel.
« Toutes chès femmes là, ch'est des têtes cratchies, Miss Lonore, que s'fit Moussieu Samuel ; et l'Gouvernement n'sait pon coumment s'y prendre pour les faithe porté r'pos! Ou pâslez d'les mettre en prison! Mais nou l's y met ! Mais sitot enfreummées, les bitches r'fusent de mangi ! Nous a bieau les mettre du fricot d'vant yeux : d'la soupe, d'la steak, du maq'thé, d'la caboche, du podin-d'riz ! les hardelles n'touchent a rin, et s'laissent enhanné la faim putot que d'manji! L'Gouvernement a èsprouvé a lus engardjichounné d'la bouollie eunne illiéte, mais les suffragettes freumment lus bouoches, coud'pisent les docteurs, et donnent des talmouzes ès gardjiennes et èscopissent dans la fache de tout l'monde - n'y'a pas moyen d'lus faithe prendre de neurtuthe. Pour ne pas les vaie mouothi en prison, l'gouvernement les laisse couore au bu de quat' ou chinq jours - et i' se r'mettent a buchi tout coumme devant.
J'pâlimes oquo tchique temps la d'sus, et Moussieu Samuel (i' s'était rappréchi oquo pus près d'mé, pour dithe cheunna) me dit que l'Gouvernement 'tait si ennié d'lus farces, qui s'n'allait yavé un prix d'offert a tchi trouvthait moyen d'lus faithe porté r'pos. Samuel (il avait mins san bras autou d'mé pour êtr' pus près) me dit tchès qu'en criais, mé qu'étais fille de bouan sens, quand a les puni, ches « hunger strikers » la, qui s'motchaient des messieurs d'la Cour d'Angliéterre. J'lis promins d'y r'pensé en m'couochant (i' s'était mins a joué avec mes deigts) et que j'lis dithais pus tard.
J'y'ai r'pensé ! Et ne v'chîn coumment j'm'y prendrais avec chés hardelles la ! J'lus dithais coumme cheunchin. Ou r'fusez d'mangi ! et quand nou vos entounne d'la pétuthe, ou vos plégnies ès gazettes que nou vos a grimmé la langue ! Eh bin ! J'nos n'allons èsprouvé aut'chose ! J'nos n'allons continué a mettre tout plien d'tchi bon a mangi sus vot' tabye, persounne ne vos forchétha a en prendre ; et si ou r'fusez d'manji, nou vos laisra couore au bu d'chinq jours! Ou pouorez vos n'allé tout drét hort de prison. Véthe ! que j'lus dithais : ch'est d'même. Allouos en hort d'ichin! Mais, d'vant vos n'allé ! et justement pour vos faithe r'souv'né d'nous, j'nos n'allons vos copé les ch'veux a ras d'la tète - et pis après j'la ras'ons ! Ou sortithez d'prison sans avé 'té forchis d'manji, mais ov la tête nue coumme un jambon ! Mais je n'vos f'thons pas eunne mie d'ma !
Ch'est d'même que j'vos les djéthithais, ches d'mouèzelles suffragettes. Et j'ai dans l'idée - j'sis d'mouèzelle me mème - qu'a ben près toutes aimthaient mus manji quat' r'pas par jour que d'se vaie eunne tète coumme un navet.
MISS LONORE PAIN
Morning News 10 April 1913
Viyiz étout: