Marie Hibou fit san jour en Cour, l'autre Mêcredi. Ou s'était l'vée du matin en exprès, et malgré chenna, je n'dêjeuni qu'a la maintchi mé, car ou cliergi la tablye et s'mins à laver les vessiaux devant que j'pusse seulement avaler une prumié tassé d'thée.
"Tch'est qu'i' y a en allant annièt don?" j'li d'mandi. "Ah!" qu'ou m'raîponni, "ch'est annièt l'grand jour! Ch'est annièt que Moussieu l'Bailli et Messieux les Juges s'en vont une feis pour toutes, nos donner nos drouaits. Ch'est annièt que l'Connaîtablye Piné s'en va être confondu, et qu'i' s'en va apprendre sa leçon, que nou n'peut pas s'motchi des femmes comme nou faisit l'temps passé! Ch'est annièt que Caroline Trachy s'en va erchever les pus humblyes apologies de la part des Membres d'la Cour, et que l'Bailli s'en va li dithe qu'il a grand r'gret qu'ou n'fut pas êlue à la dernièthe êlection, mais qu'oulle a parfaitement l'drouait de s'porter candidat, et i' s'en va li souhaiter bouanne chance à la nouvelle élection qu'i' s'en va ordonner, et pis Moussieu Piné s'en va en r'tenin, li avec touos les frais, le dêdommagement et toute la pêque!"
"Porte nous r'pos don, espêce d'imbésile!" que j'li dis quand oulle arrêti un moment pour erprendre s'n haleine.
"Tchi d'jantre qui t'a mins tout chu niollin-là dans la tête? Tu t'en vas vais bétôt tch'est qui s'en va en être, de ta Caroline et ses drouaits! Tu n'connais pas louai, don?"
Et je m'en fus à l'armouaithe pour ramasser un livre d'louai que j'garde là, avec l'intention de li liaithe un extrait ou deux ayant rapport à la tchestion, mais quand je r'vins avec man livre, oulle avait dispathu et deux minutes opprès je l'avisi sus les steps de la cour en grande conversation avec George Vardon, et je m'douti qu'oulle 'tait à li d'mander d'li garder une bouanne pliaiche pour qu'ou pusse vaie tout et entendre les discours comme-i'-faut.
Je n'la r'vi pon d'vant deux heuthes de l'arlévée, quand l'jugement avait 'té donné et que tout était fini.
Ou pathaissait d'si mauvaise humeur que j'avais quâsi peux d'entamer la chose.
Sans doute, je savions l'rêsultat, nous, à la boutique, car le Chef, qu'avait 'té en Cour toute la matinée etait r'venu avec une brachie d'copie, et nos avait dit, en entrant, "Le Connaîtablye a 'té dêchergi!"
J'étais bain content, mé, car j'avais fait une gageaille d'un chelin avec not'e foremainne que che s'sait d'même.
Pour faithe Marie Hibou enragi, je li dis comme chenna, "Eh bain, Caroline a-t-alle 'té assermentée?"
Ch'en fut assez! Ou vint dans une futhie et c'menchi à servi d'un langage abôminablye contre touos les messieux d'la cour.
Le Chef fut obligi de s'en mêler, et quand vint un temps i li ordonni de s'en aller à haut dans sa mansarde et de n'faithe pas un patheil tapage dans la boutique.
Je n'aithais pas ramonté avec lyi dans chu temps-là, nan pas pour chinq louis!
Pus tard dans la séthée, quand oulle eut ieu une tassée d'thée, oulle avait r'prins un mio d'bouan sens, et don, ou m'raconti comment qu'tout s'était passé.
Ou n'avait pas une bouanne pathole à dithe de personne, sinon de l'Avocat l'Cornu.
"Ah! tchi nice homme!" qu'ou s'fit, "i' faut ouï comment qu'i' pâle bain des femmes. Ch'est-i mé qui voudrais être la femme d'un moussieu comme chenna, au lieu du minséthablye ôti que j'fu bête assez d'mathier.
Là-d'sus, j'prins tout-de-suite le paîvre-au-nez mé, car je n'prétends pas qu'ou faiche des compathaisons comme chenna.
Huh, pouore idjote, tu n'sais pas don que l'mêtchi d'un avocat est de pliaidgi la cause du point d'veue d'san client, et que souvent qu'i' dit des choses tout à fait contraithes à ses opinions personnelles!
Tu n'gagnes rain d'ardgumenter Caouain, ch't Avocat-là est un chier, et si jamais j'ai une cause en Cour et qu'i' m'faut un Avocat, che s'sa li que j'engag'geai, là don!
Oh, ma pouore êfant, j'li dis, j'connais bain Jack Le Cornu, mé, et je crai qu'il aithait pus d'avis que d'se touôllyi avec ditet comme te!"
Je nos entre disputîmes pour une démieuthe, et je crai bain que j'y séthions oquo, sinon que l'Chef me criyi qu'il avait besoin d'me et don j'la laissi. Enfin tréjous, ou dit qu'oulle est bain dêterminée de persuader iun des nouviaux Députés d'amener un Projet d'Louai devant l's Etats pour permettre ès femmes d'être candidats pour autchune poste.
Je li souhaitte jouaie!
Caouain
Les Chroniques de Jersey 20/1/1923
Viyiz étout: