Les jours que je n'sis pon embarassé a èscrithe pour la gazette, j'm'otchupe dans l'office et parmi les machines a met' tout en bouon r'pathe. Ch'est mé qu'ai la djob de vaie qu'les reues n'manquent pon d'huile, que l's èscrouettes n'abanounne pon, que les lattes de bouais n'teurquent pon, et a faithe la mine de sué d'travas toutes les fais que l'chef s'adounne a passé.
J'tais par les c'mins, l'aut' matin, a digotté d'un bord et d'lautre, quand l'suffliét du Chef sufflyit: "Send Mister Pau up here," qui dit. Ch'est-tan-tchi, mé v'la qui ramonte, après avé bin essuyé mes mains graisseuse sus la casaque a yun des clèrques qu'était pendue dans l'allée. J'trouvi l'Chef assis a sa tablye de travas. J'nos mînmes a d'vîzé.
"Ous avez eunne fille, a ch'que j'en comprends?" qui fit.
"Oui, d'ja, Moussieu," que j'rèspounni; "eunne bouonne grosse ronde rouoge courte hardelle, qu'a eunne bouoche coumme un tcheur, des iers qui r'lîzent, et des vras coumme un capestre. Voudraîtes-ous a vaie, par chance? Ou sait liethe, èscrithe, chiffré, fricachi d'l'oignon, rempiêté des cauches, dithe san catechisme par tcheu, èsfondré eunne poule, ouôlé des lincheurs, transplianté du pouothet, chanté des cantiques, èscallé des féves, amouochlé des - "
"Shut up!" qui m'dit, quoéq j'n'avais pas fini d'en dithe la maintchi. "Sait'alle cachi eunne bike?"
"Ah, pour ch'la, Moussieu, nennin dja! Sa méthe y'a tréjous mins èmpech'ment. Ma femme, viyous, a d'drôles d'idées sus certaines choses. J'vé bin qu'ou n'counaissis pon Laïzé."
"Ch'est domage," qui dit. "J'avais pensé lis fourni un moto-bike pour qu'ou fûsse d'un bord et d'l'autre dans la campanne, vaie les gens, allé ès concerts et reunions, pour èscrithe la d'sus sus la gazette. Pâslez-en a vot' femme."
Quand vint l'sé, et que j'fut rentré siez nous, j'raconti a nos gens ch'qu'avait dit l'Chef. Lonôre coumme je m'y'attendais, 'tait raide "pour"; mais sa méthe aheucti longtemps d'vant que d'consenti. L'idée d'vaie sa fille èstcherfourchie sus eunne moto-bike ne lis pliaisait pon entou. "Nou t'vèrrait offûche les cauches les jours qui vent'tait," qu'ou dit en rouôgissant; "et pis l'trésson d'la machine pouôrrait offûche te dèslotchi tchiq'chose dans tan d'dans - j'counnais eunne fille qu'a d'l'ieau sus ses rignons par avé 'té sus un moto-bike le jour de ses neuches."
J'eûmes toutes les peines a décidé Laïzé a dounné san consent'ment. Ché n'fut que quand Lonôre y'eut promins d'prendre bin garde de n'pon s'èstrueûlé dans l'pité, ni s'capuchi contre les muthâlles, qu'ou finit par dithe oui.
Lonôre s'en va don apprendre a cachi eunne moto-bike. Y'en a eunne vielle de s'conde-main dans l'bel du "Post" que j'm'en vais raffistolé avec d'la corde et du ouaieur; ché s'a la d'sus qu'ma fille f'tha s'n'apprentissage. Et il est con'v'nu - ch'est sa mémée qu'a fait les conditions - que touôs les ridfjeaux d'l'office s'ont baissis quand ou s'a a pratitchi, pour que les clèrques ne vaient pas ch'qui n'les concerne pas si par chance ou v'nait a s'èstrueûllé les fiers en haut.
L'affaithe en est là pour a ch't'heu. Quand Lonôre sétha cachi et gouvèrné, nou la vèrra par monts et par vaux, plieuve ou vente, a r'gardé par sus les fossés, a èspié dans les f'nêtres, a èscouté les gens qui s'ent' pâslent, a siéthe les couplyes qui r'vinnent de la chapelle. J'éspethe que tout l'monde lis f'tha la bin-v'nue. Si par chance ou s'adounnait a passé par siex vous sus l'heuthe du dîné, eunen bollée d'soupe n'est pas de r'fûs. Et si jommais tchiq'un la trouve èstrueûllée contre eunne pierre-de-hèche ou èsmaglyie contre eunne meule-de-prînseu, faudrait en l'heu téléphoné au "Post" - nous envièthait eunne van ramassé les brédelles.
Piteur Pain
Evening Post 3/2/1916
Viyiz étout: