L'Editeu s'adounni à passé par siez nous l'aut'e jour qu'il 'tait à èsmotchi des r'tardataithes: l'idée lis vint d'entré bèthe eunne modgie d'cidre. "Bonjour, Missis, qu'i dit à ma femme, m'n'anmin Pepin Bilo est-i' dans l's alentours?"
J'avais dounné encherge à ma femme de faithe bein attention à lyi d'vant que de r'chevé autchun êtrangi - rapport ès Allemands. Oul aheucti un mio d'vant que d'dithe que oui. Pepin 'tait par dédans, dans la cônièthe, là où-est qui passe le pus bé d'san temps, par crainte de s'vaie offuche êglièmmi par eunne bombe si s'abusait à traîné es bels pus qui n'fait."
I' fut passabliément êtonné d'vaie l'editeu d'la Chronique - je n'sis pas pus d'deux ans en r'tard pour la gâzette, et tout l'monde sait bein qu'les faiseurs de gâzettes ont tout plien d'sous à la banque et n'comptent pas sus lus abon'ments pour péyi lis c'min. J'en 'tais à l'dêvisagi et à me d'mandé tchi djantre em'nait chu pèrrot-là dans nos pathages, quand l'idée m'vint comme un coup d'foudre que ch'tait offuche pour mé forchi à volunteeré pour le frunt. Ma tchoeu s'mint à battre, mes g'nors à tremblié, j'sentais comme du gliaichon avaut l'dos, et je m'mins à fremi d'pis les pids jusqu'au coupé d'la tête.
Par bonheu, i' n'touchi mot là-d'sus. "Bram Bilo est mort, qu'i dit; Piteur Pain s'en fut à la djerre chès S'tembre et nou n'a pon r'ouï pâslé d'li d'pis. Elie profite de s'n absence pour cherchi brit à Laïzé, et j'veins justement d'apprendre que deux policemainnes fûtes veus portant l'Caouain à la Station sus eunne chivièthe à bras. Et mé qu'avais idée d'publié un articlye de Bouanne Année en jêrriais. N'y-a pus qu'vous, Maît' Pepin, sus tchi j'peux compté."
Quand il eut pâslé oquo tchique temps; qu'i m'eut asseuthé qu'i n'y-avait autchun dangi pour mé; que l'Gouverneux n'avait pas dit qu'les souhaits 'taient chose prohibée; qu'la Cour n'avait pas oquo publié rein contre chenna; que l'gouvernement angliais n'dithait pas que ch'tait des munitions de djerre à l'ennemin, j'dis que oui! qui pouvait compté sus mé; que j'm'en allais en l'heu' m'changi (je n'peux êcrithe sinon en blianche quéminze, mes grises braies, et un toppeur sus la tête) et qu'il éthait s'n articlye le lend'main matin. Là-d'sus, i' m'dounni un r'chu mes deux années d'gâzette.
Coume i' n'fut pon accordé entre nous combein long i' fallait en mettre, ni à tchi i' fallait adressi des souhaits; coumme, d'un aut'e côté, nou n'sait trop tchi sorte de souhaits sont bons par le temps tchi tchoeur, et coumme j'prins bouan soin d'avé man r'chu sinné d'vant qu'i s'en fusse, je m'sens libre d'en faithe coumme je voudrai. Ch'est t'en tchi, et souos toutes les circonstances, je m'contente de vos dithe à tous, individuellement et collectivement, hoummes, femmes, mousses et soudards:
J'vos souhaite une Bouanne Année
J'en êcrithais deux colonnes que je n'pouôrrais dithe mus, n'est-che pon? J'vos souhaite une raide bouanne année, numétho iun, de preumié classe!
Pepin Bilo
La Chronique de Jersey 30/12/1914
Viyiz étout: