Juîn 2002 s'sa un mais înmportant pouor les cheins tch'aiment les langues Nouormandes - lé Jèrriais, l'Dgèrnésiais et, bein seu, l'Nouormand - pa'ce qué la Fête Nouormande (connue dans la grand' tèrre comme “Fête des Rouaisouns”) s'en va v'nîn siez nous en Jèrri.
Mais pouortchi qu'ch'est înmportant? “Chenna donne eune pus grande audienche à nos langues,” dit Tony Scott Warren, Président d'l'Assembliée d'Jèrriais. “La Fête dait attither les jannes gens tchi n'vîsit'tont janmais eune séthée traditionnelle, et né v'là tch'aîgu'tha à ravigoter les langues et mouontrer qu'lé Jèrriais, et l'Nouormand, n'sont pon morts.”
Ch'est la grande fête des couôsîns Nouormands, quand les cheins tchi pâlent nos vielles langues lus assembl'yent pouor èrciter, chanter, danser et chârer lus littéthatuthes et couôteunmes - et sustout pouor mouontrer au monde les tchultuthes d'la grand'tèrre et des Îles d'la Manche, car la Fête est organnîsée dans eune difféthente pliaiche châque année. En 2001, la Fête eût lieu à Coutanches et en 2003, j'allons r'viagi en Dgèrnésy.
“La fête des Rouaisouns est devenin l'assembllaée de la tchulture nouormaunde la pus importaunte de l'annaée,” dit l'Sieur Hubèrt Godefrey, Président d'l'Assembllaée ès Normaunds. “Ch'est duraunt ch'est déeus ou treis jouos là que no rencountre les gens interressi par la langue et la tchulture nouormaundes et que no peut partagi et faire vali le trava qu'est fait par l's euns et l's aôtes.”
2002 s'sa la pus grande fête jusqu'achteu - et la miyeuthe. J'allons faithe eune promotion d'la langue Jèrriaise en Ville, auve l'aîgue dé Centre-Ville, en mèrtchant les lédgeunmes dans l'marchi, par exempl'ye, auve lus noms en Jèrriais. Et y'étha étout d'la promotion d'produits Nouormands auve l'aîgue d'la Maîson d'Nouormandie à St. Hélyi.
Et né v'là ieune des pus înmportantes choses: qu'la promotion d'eune langue régionale (coumme disent les Français) peut aîdgi l'êconomie. Ch'est chein qu'les Gallouais, les Manx, les Irlandais ont apprîns. Et i' faut admett' qu'la Fête Nouormande a 'té dans eune cèrtaine m'suthe înspithée par l'succès des Festivaux Celtiques tch'ont fait du bein pouor les langues et les tchultuthes dé Galles, d'l'Êcosse, d'l'Irlande, d'l'Île dé Man et d'la Brétangne. Et ch'est hardi bouôn pouor lé tourisme étout.
“Ch'est reide importaunt de venin en Jerri,” dit l'Sieur Godefrey. “Tout l'intêret des Rouaisouns, ch'est que la fête viage dauns la Graund Terre et dauns les Iles. Pour nous, cha qu'est fait dauns les Iles est eun exemplle. Les Jerriais sount pus avaunchis que nous et l'exemplle de Jerri nous doune pus de forche pour countinuaer à défendre noute héritage. La tchulture nouormaunde, à mi-quemin des tchulture angllèque et fraunçaise à encou sa plèche en Europe. Je deit dire étou que les Nouormaunds aiment touos Jerri et que ch'est tréjous eune fête d'allaer là.”
J'éthons d'la chant'tie et d'la dans'sie dans les rues d'la Ville - v'là tchi s'sa bouôn pouor les touristes et les gens d'Jèrri. Y'étha un concèrt à St. James par la dgaîngue “Magène” tchi fait des chansons sus les textes dé Jèrri, dé Dgèrnésy et d'la grand'tèrre. J'avons dêv'loppé la crouaîs'sie d'la Ville en costume à seule fîn qué chenna d'vînsse eune pathade pus formelle tchi offritha pus d'un show ès cheins tchi l'vaient. Ché s'sa étout acouo d'la publyicité pouor la journée d'fête au Mangni d'Sanmathès, où'est qu'j'éthons les èrcitâtions, les pièches dé thiâtre, les chansons et un tas d'aut's activités. Pouor les cheins tchi n'comprennent pon hardi bein l'Nouormand ni l'Dgèrnésiais nitout, y'étha coumme tréjous à la Fête Nouormande un livret d'pièches dans tchi nou peut siéthe les textes et aver deux-trais mots d'explyicâtion.
“Le programme des Rouaisouns en 2002 semblle hardi counséquent,” ajouôte lé Sieur Godefrey, “et je sis seur que cha sera eune graund fête des Rouaisouns.”
Viyiz étout: