L'autre jour, j'eus la chance d'aller à la Faithe dé St. Martîn dans la Ville dé St. Hilaire au fond d'La Bâsse Nouormandie. Eh bein, nou sait qué la Faithe dé Lessay est grande, mais la Faithe à St. Hilaire est la deuxième pus grande dans la Nouormandie, auprès Lessay. I' y'a pus dé 800 (chents) exhibiteurs dans les routes dé la Ville, et i' y'a quâsi sept milles dé halles alentou des routes, ruettes et les pièches des marchièrs. Y'avait un fliotchet d'gens à la fête et nou-s-avait d'la diffitchulté à s'faûfiler parmi l'monde. Y'avait des grandes machinnes à battre tchi 'taient bein pus grandes qué chein qu' j'avons ichîn en Jèrri, et les autres machinnes pouor l'agritchultuthe, man doue, i' sont si grandes tch'i' faut eune êtchelle pouor pouver grîmper et arriver au siège dé la vouaituthe pouor pouver la cachi.
Eune méthe n'tait pon contente auve san p'tchiot et 'tait à l'talmoûther en plieine veue dé tout l'monde pa'ce qu' il avait 'té mêchant. Y'avait étout deux'trais jannes gas tch'avaient bu trop et i' taient un p'tit mio trop excités et pouortant, ch'tait dé bouonne heuthe dans l'arlévée!! Nou n'vait pon chonna trop souvent en France, quand même qué les aubèrges sont ouvèrtes toute la journée.
Mais, les Halles pouor la nouor'tuthe 'taient les siennes éyou qu'les gens 'taient à faithe lus achats, et y'avait un tas d'chouaix auve des crêpes, des saûcichons et saûciches étout et un tas d'pâtich'chies. Oh mais, les tentâtions!!
J'îthai acouo eune autre fais, j'espéthe.
F. A. Le M
2015
Viyiz étout: