Moussieu, - J'vos écrit pour vos féliciter de vot' dernier numétho des “Chroniques de Jersey” et j'm'd'mande sis par chance y'éthait un p'tit coin sus vot' gazette pour qu'une femme pouorrait s'explitchi car j'ai bain l'embarras à comprendre les choses qui s'disent par le public ach'teu!
Les hommes de apr ichin sont otchupès sus le Comité d'la Défense de l'Ile et sus les tribunaux et j'n'aime pon à les questioner.
Dites mé donc tch'est qu'en est? i' pathaît qui faut que les femmes aillent vraitchi ach'teu - qui y allaient bain le temps passé, etc., etc. - Et vaithe j'le savons bein et nou z'appelle ch'la “les bouans vièrs temps.” - Il est vrai que les Jerriaises avaient oublié à faithe le travas de d'hors, mais, i' faut l'dithe, d'pis la guerre i n'ont peux de rain.
I' peuvent sarcl'yi, houetter, soigni les bêtes à cônes et s'habiyi jusqu'à la dernié chique. Pour de mé je sis quasi à bût et j'sis à copé du jonc (sans mitaines s'i vos plaît) j'pouvons-ti faithe mus? - J'm'd'mande - comment que les femmes qu'ont d'esfants à envier à l'êcole peuvent aller pour la mathée; quand y manquent un jour à l'êcole ne v'la l'offici scolaire qui s'en veint comme un fo d'mander oùest qu'i sont? Et bain, qui l'y'aille li, au vrai, l'offici scolaire...
Et pis yoù qu'est les maisons avec six ou sept filles comme le temps passé. Tout ch'la, ch'est du d'vis, et si jamais j'me rencontre avec yun d'ches messieurs-là qui d'visent si bain - j'lis dithai: “Eh bain, j'espéthe que vot' Dame s'en va faithe tout le travas d'tchuisinne et le nettisage pour que vos servantes puissent aller vraitchi pour vot' fermi,” car nou m'a dit que hardi de ches messieux-là ont té malins assez pour louer lus fermes d'pis la d'guerre. - Et dites mé ettou' - peuvent i empêchi la mer d'monter? j'en crains!
Elizabeth
12/5/1917
Viyiz étout: