Fallbrook,
California, USA.
Lé 25 dé mar, 1978.
Moussieu l'Rédacteu,
Dans la gâzette du 16 dé févri j'liêsais tch'i' y'avait un manque dé support pour eune démande dé réduction dé louages par les locataithes du “United States Tenants Association.” Comment dgiâtre, j'pensis, tch'i' s'attendent qué des gens d'meuthant ès Etats-Unis s'en vont supporter des pliaintes dé gens en Jèrri? J'n'avais même janmais ouï pâler du “United States Tenants Association” ouaithe qué j'ai d'meuthé quâsi souoxante ans en Améthique! Et pis, en liêsant pus liain, j'ai rêalisé qué ch'est eune associâtion d'gens en Jèrri tchi s'appellent “United” mais qué “States” veurt dithe L's Etats d'Jèrri étout.
Dans la colonne “Looking Back” dé septante-chînq ans j'vai l'mention qué les Caves dè Champion (mênommées “Troglodyte Caves”) appréchaient lus aînage (vîngtch'un an) dans chu temps-là - 1903. Il' avaient c'menchi à creûser pour faithe les caves, nouos dit la gâzette, lé 14 dé févri, 1875. J'm'èrsouveins bein dé l's aver visitèes bein des fais étant mousse, car ch'tait man Papa Giffard tch'avait stchulpté toutes les decorâtions, armueûthies, estatues, etc. tch'étaient l'attraction des souô-dîsantes caves. J'eus la chance dé les r'vaie, en d'lacres, y'a eune tchînzaine (pus ou mains) d'années dévant tch'i' fûssent dêlâbrées pour donner un empliaichement pour bâti des maîsons. Y'a longtemps qué les Sieurs Champion et Giffard ont pâssé l'pas, et les Caves dé Champion né sont qu' eune mémouaithe. J'n'ai janmais comprîns pour tchi raîson tchi fûdrent mênommées “Troglodyte” et j'crai bein tch'i' n'y'a pèrsonne vivant d'nouos jours tchi pouorraient nouos l'dithe.
J'vai qué lé parti travailliste Angliaise sé d'mente du fait qué des riches Angliais d'meuthent en Jèrri et tch'i' voudrait l[es] forchi à payi d's impôts à la trésor'rie d'Angliétèrre. Mais j'sis rasseûthé au sujet en liésant la gâzette et viyant qué l'Sieur René Liron s'en va prendre sus li d'dithe ès membres du Parlément Angliais dé lus mêler d'lus affaithes.
J'sis surprîns d'vaie dans la même gâzette qué la tchestchion d'un “Christmas bonus” èrest sus l'tapis. J'sis êtonné qué L's Etats pèrdent lus précieux temps à considéther du niolîn d'même quand il est bein êvident qué les Connêtabl'yes prennent soin des cheins tchi sont dans l'bésoin, pon seulement dans les temps d'Noué mais dans touos temps. Est-i' possibl'ye tch'il' ont peux d'vaie eune aut' démonstrâtion dans l'Vièr Marchi? Les cheins tchi prennent part dans des démonstrâtions d'même f'thaient mus d'et' en travas et L's Etats ont des choses bein pus împortantes à considéther qué des affaithes tchi sont pûtôt la responsabilité des pâraisses.
Lé portrait du Gardîn d'Olivet montre les d'gâts rapport à la cirtchulâtion des motocyclettes et la folâtréthie d'lus manoeuvres dans l'gardîn. Ch'est honteux d'vaie la destruction du bieau tapis d'hèrbe, bruëthe et geon tch'était là dans man janne temps quand j'tais à l'Ecole du Dînmanche à l'Eglyise dé St. George et qué j'avions l'Thée des Trais Pâraisses dédans. J'aimethais pouver r'vivre ches bieaux jours quand nous-s-allait là dans les vainnes, tchiquefais à deux j'vaux, et qu' nou prannait soin d's'assiéthe dans la vainne à côté d'la janne fille tchi vouos pâssait l'pus près du tchoeu pour lé moment. Lé Gardîn 'tait mangnifique pour les jeux et les courses.
Comme jé l'dîsais, ch'est honteux d'vaie comment qu' les jannes font un d'sért d'autcheune êtendue d'térre ou d'plouse où'est tch'i' peuvent faithe dé lus tchian sus eune motocyclette. Il' éthaient dêtruit Les Blianches Banques à St. Brélade si l's autorités n'y'avaient pon mîns la main, et i' sont en trains d'faithe la même chose sus partie ses Landes à St. Ouën.
Quand tchi qu' la jannéche s'en va apprendre un mio d'avis?
George d'La Forge
Viyiz étout: