Lé 14 dé mai, 1983.
Moussieu l'Rédacteu,
Pâlant des Giffards la s'maine pâssée, quand j'vouos dis qu' ma m'mèe en 'tait ieune, mé ramémouaithe qu' en r' gardant pour tchique affaithe dans l'vièr Encyclopedia Britannica tch'est dans ma biblyiothèque au Ménage ès Feuvres à St Ouën en Jèrri, j'trouvis mention des illustres Giffards dans lus temps.
William Giffard, par exempl'ye, décédé en l'année 1129, fut Êvêque dé nouot' diocèse dé Winchester et "Chancelier" du Rouai Dgilliaume Deux. I' fît eune mangnifique restaurâtion d'la Cathédrale dé Winchester, nouos dit l'Encyclopedia. Chu William Giffard 'tait probabliément l'fis d'iun des deux ou trais Giffards tch'étaient auve Dgilliaume lé Contchérant à la Batâle dé Hastings. Iun d'ieux, Walter Giffard (j'ai dans l'idée qué ch'tait li tch'était Seigneur dé Longueville en Nouormandie), avait fourni trente navithes au Contchérant - d' après Phillips Russell dans san livre à san sujet - pour aîdgi à transporter ses troupes en Angliétèrre.
Un aut' tch'était probabliément l'fis d'iun des cheins tch'étaient à la Batâle dé Hastings 'tait Hugh Giffard, dé Boynton, Wiltshire, en Angliétèrre. Il 'tait l'péthe dé Godfrey (ou Geoffrey) Giffard, né circa 1235, tchi fut Êvêque du Diocèse dé Worcester. I' mouothit en 1302.
J'visitis sa cathédrale en 1967 et j'vis san tombé. Au pid d'chu tombé dans la Cathédrale dé Worcester y'a un aut' tombé où'est qué "Lady Giffard," femme dé "Lord" Giffard, est entèrrée. J'n'ai janmais mênagi à dêcouvri l'identité dé chu "Lord" Giffard, à mains tch'i' fûsse l'Êvêque même. I' s'pouôrrait bein, dépis qu' nou-s-appelle un Êvêque Monseigneur.
Godfrey (ou Geoffrey) Giffard avait un fréthe Walter. L'année d'sa naissance n'est pon r'cordée dans l'Encyclopedia Britannica, mais i' mouothit en 1279 et fut entèrré dans. York Minster. Il 'tait Êvêque dé Bath and Wells en 1264 et pus tard Archévêque dé York. En 1265 il 'tait "Chancelier" d' Angliétèrre, et quand lé Rouai Henri III mouothit en 1272 i' fut iun des trais Régents appointés pour gouvèrner lé Rouoyaume d'Angliétèrre jusqu'au c'menchement du règne d'Edouard lé Preunmyi en 1274. Né v'là eune carriéthe tchi vaut la peine dé r'corder!
Y'a ieu un tas d'Giffards dans la pâraisse dé La Trinneté à un moment donné tch'ont donné l'nom au Havre Giffard. Et dans man temps y' a la fanmil'ye illustre tchi nouos a donné un Écrivain, d's Avocats, officièrs dans l' Armée Rédgulièthe et des Jurés-Justiciers dé La Cour Rouoyale. Et ch'est damage qué la fanmil'ye s'en va dispathaître, manque dé d'scendants du nom, comme en est l'destîn d'un tas d'vielles fanmil'yes Jèrriaises dé nouos jours. Quand j'allis noter les noms sus les tombieaux des Jèrriais entèrrés dans les chinm'tchiéthes des églyises Anglyicannes à La Côte, j'n'y trouvis pon d'Giffards. Mais ch'est seux tch'i' y'en eut au mains iun, Jèrriais ou Nouormand, tchi s'êtablyit là.
Dans la gâzette "Ottawa Journal" du 31 d'octobre, 1977, j'vis eune articl'ye au sujet d'la Province dé Tchubec tchi nouos dit qu' en 1634 Robert Giffard 'tait Seigneur d' eune êtendue d'tèrrain dans la provînce. Lé tèrrain m'suthit siex milles par siex milles dé la banque dé ieune des riviéthes St Laurent, Ottawa ou Richelieu. I' fut l'preunmyi à diviser sa tèrre pour lé bénéfice des cheins tchi voulîssent s'êtablyi dans la province. Lé fait tch'il avait appathemment l'chouaix dé prendre ses siex milles cârrées l'long d'la banque dé ieune dé trais riviéthes est, à m'n idée, r'mèrquabl'ye.
Ch' est grandement damage, quand nou-s-y pense, qué des vielles fanmil'yes Jèrriaises comme les d' Auvèrgnes, pour en mentionner ieune, sont péthînmées en Jèrri, et qu'un tas, d'nouos jours, sont en dangi d'dispathaitre manque dé garçons à mathier et continnuer l'nom.
Ch'est seux qué si nou pouvait r'vénîn dans chent ans d'ichîn, les noms d's habitants d'l'Île n'èrsembliéthaient pon ès cheins d'à ch't heu, comme un grand nombre des cheins d'à ch't heu né r'sembl'yent pon ès cheins du c'menchement du siècl'ye actuel. Et nou peut penser, étout, qué dans chent ans Jèrri étha p't-êt' pèrdu sén indépendance à cause du "Welfare State" dé l'êtat d'sa politique tch'engaûme les sou pus vite qué nou n'peut les gângni, et qué l's Îles dé La Manche es'sont adjointes au Comté d'Hampshire. Les savants nouos disent qué quand un peupl'ye pèrd sa langue, i' pèrd sén îndépendance, et j'pèrdons la nouôtre à grands pas.
Heutheusement, lé dangi d'pèrdre nouot' indépendance est bein p'tit d'en par ichîn viyant qué l'Gouvèrnément Britannique nouos est favorabl'ye, mais un tas d'êvènements peuvent changi l's affaithes auve lé passage du temps. Enfîn, comme nouos l'dit l'vièr diton: "La fîn du temps f'tha tout vaie"!
Viyiz étout: