Le Ménage ès Feuvres,
Lé 16 dé juilet, 1977
Moussieu l'Rédacteu,
Vouos r'souv'n'ous d'aver veu Les Caves dé Champion à La Crouaix d'Bouais? Quand j'tais mousse les caves avaient dêjà ieu l'mênom dé "Troglodyte Caves", donné par les villais, et La Crouaix d'Bouais 'tait dèv'nue "Five Oaks". Mais pour lé vrai Jèrriais ché s'sa tréjous La Crouaix d'Bouais.
Jé n'pouorrai janmais oublier Les Caves dé Champion car ch'tait man grand-péthe matèrnelle, lé Cap'taine Jean Philippe Giffard, tch'avait fait et stchulpté à bein près toutes les dêcorâtions, estatues, stchulptuthes et aut' objets tch'étaient là. I' dait y'aver acouo des Jèrriais tchi s'èrsouveinnent d'aver veu les souô-dîsantes Caves dé Champion, car i' n'taient pon des caves.
L'empliaîchement 'tait un pid ou deux en d'ssous du nivé des tèrres à s'n alentou, et y'avait un p'tit êtang emmuthailli au mitan d'l'empliaîchement auve eune manniéthe dé tour dans l'mitan d'l'êtang auve des grand' f'nêtres en vèrre dé toutes les couleurs - un vrai "empire des fées" pour les mousses dé chu temps-là tchi n'avaient pon la télévîsion à lus montrer les mèrveil'yes du monde comme à ch't heu.
Y'avait des p'tites salles bâties l'long des muthâles tch'entouothaient les souô-dîsantes caves, et toutes sortes d'objets d'dans, d's ornements, des "bustes" dé la Reine Victoria et du Prînce dé Galles et d'la Prîncêsse Alexandra, et d'aut' membres dé la fanmil'ye Rouoyale, et d's armeûethies sus les muthâles.
Ieune des grandes attractions 'tait eune estatue qué Papa Giffard avait stchulpté dé Cetywayo, chef des Zoulous. La chose èrmèrquabl'ye était qué l'estatue était d'un homme physiquement compliet; ch'est en tchi i' fallut lî mett' un p'tit cotillon pour muchi chein tchi n'sé montre pon. Mais lé mot tch'i' y'avait tchiquechose à vaie souos l'cotillon fut chuchoté par les uns et l's aut', et des femmes tch'allaient pâsser l'arlévée là, en r'gardant l'tou d'ieux sans faîsant la minne dé rein pour vaie tch'i' n'y'eûsse pèrsonne à les r'garder, souôl'vaient l'cotillon pour satisfaithe lus tchuthiôsité. Et i' n'taient pon d'sappointées!
V'la tch'était amûsant, et en même temps embarrassant pour les propriêtaithes des caves, et pour y porter r'miède i' lus dêcidîdrent dé bâti un p'tit carré appartènement auve eune ouvèrtuthe dé la grandeu d'eune fénêtre en d'vant pour louogi l'chef Cetywayo. Mais v'la tchi n'changit pon la tchuthôsité des femmes. Ch'tait même en lus faveur car, sans êt' appèrchues par tout l'monde comme quand l'estatue 'tait à l'ouvèrt, i' n'avaient qu'à freunmer lus parasol et l'pâsser par l'ouvèrtuthe tchi r'présentait la f'nêtre et souôl'ver lé d'vant du cotillon auve lé but!
L'empliaichement des Caves dé Champion fut acaté pour y bâti des maîsons y'a eune vîngtaine d'années (pus ou mains), et d'vant tch'i' fûsse clièrgi, j'allînmes lé vaie, lé Docteu Frank Le Maistre, OBE, et mé. Tout 'tait en ruinnes, mais l'estatue dé Cetywayo 'tait acouo là dans toute sa fanmeuse nudité, car lé p'tit cotillon avait dispathu auve lé pâssage du temps. Lé gardgien d'l'empliaichement m'dît qué j'pouvais l'aver, autrément ou s'en allait êt' dêtruite. Jé r'fûsis l'don auve èrmèrcîments. Tch'est qu' j'en éthais fait?
Jé n'sai pon quantchi qu'les souô-dîsantes caves fûdrent abolies comme lieu d'expôsition et d'èrcréation pour lé publyi, mais j'créthais qué ch'tait dans l's envîthons d'l'année 1900. J'm'èrsouveins d'y'aver 'té deux-s'trais fais d'vant ch't' année là. Papa Giffard mouothit en 1892 et il est probabl'ye qué les caves fûdrent freunmées tchiques années auprès sa mort viyant tch'i' n'y'avait pus pèrsonne à maint'nîn l's estatues et aut' ornéments en êtat d'exhibition.
Ch'tait eune grand' fête pour un mousse d'aller vaie Les Caves dé Champion. À c'menchi, d'aller des Landes dé St. Ouën à La Crouaix d'Bouais dans chu temps-là 'tait eune aventuthe à mains qu'les pathents fûssent riches et eûssent j'vaux et quèrres et l'temps à lus disposition. Y'avait eune beusse tch'allait en ville lé mêcrédi et l'sanm'di, mais un travailleux n'pouvait pon affaûrder à pèrdre un jour dans l'mitan d'la s'maine. I' fallait y'aller l'sanm'di - et pon trop souvent dans l'couothant d'l'année. Arrivés en ville dé vièr onze heuthes, i' fallait trouver san c'mîn, probabliément à pid, à La Crouaix d'Bouais. Et i' fallait r'vénîn en ville en temps pour èrprendre la beusse pour St. Ouën dans les chîntch'heuthes. Mais tchi bieau viage, et tchi belle aventuthe!