San Antonio, Texas, U.S.A.
Lé 18 de janvyi, 1975
Moussieu l'Rédacteu,
Les gâzettes dé Jèrri arrivent en blio, à ch't heu. Nou n'en vait pon pour tchiques sémaines et pis il en arrive deux-s'trais en mème temps. Les cheinnes du vîngt- tch'ieune et vîngt-huit novembre, et la cheinne du chînq dézembre sont v'nues chutte sémaine. Comme ou l'viyiz, les nouvelles ont dêja siex s'maines par lé temps tch'il' arrivent ichn. Sans doute, i' n'en sont pon mains beinv'nus viyant tch'il' ont d'l'âge. I' faut que j'sais large d'esprit dépis qu'j'en ai mé-mème, dé l'âge! Et j'ai espéthance qué les lettres et gâzettes s'en vont êt' transportées bein pus vite à l'av'nn quand Mdlle. Egan s'en va ét' à controller l's affaithes postales en Jèrri!
La preunmié chose qué touos les Jèrriais à l'êtrangi font en ouvrant la gâzette est d'èrgarder l's annonces des décès, et j'en ai 'té du nombre toute ma vie sénon à ches drien. La preunmié chose qué j'fais à ch't heu est d'ergarder pour lé portrait dé m'n anmîn l'Député Ph'lippe de Veulle, car j'ai r'mèrtchi tch'il est dans quâsi toutes la gâzettes dépis tch'i' n'est pus populaithe parmi les reporters. Sa tâche dans l'gouvèrnément d'l'Île et L's Êtats n'est pon aîsie. Pèrsonne né peut pliaithe à tout l'monde, et i' faut du couothage pour dithe Nannin quand eune rétchête est contre les règl'yes ou la louai. Ch'est eune bouanne chose pour li tch'i' n'est pon court dé pé et tch'il est large d'êpaules, et ch'est bein seux tch'il est v'nu à connaître lé vièr diton tchi nouos dit qué Tchi sèrt lé publyi sèrt un îngrat!
Eune chose tchi m'frappe en liêsant les gzettes dé Jèrri est l'couôtement des louages. J'vai qu'un propriêtaithe 'tait à chèrgi quatorze louis et d'mi la s'maine pour un seul appartènement, ameublié en partie. Auve la réduction dé quat' louis et d'mi ordonnée par lé Tribunal, v'la tchi met lé louage à dgiex louis la s'maine. A m'n idée ch'est honteux d'chèrgi des louages dé meme, et j'sis bein content d'vaie, quand nou liet les cas d'vant l'Tribunal, qu'en général ch'n'est pon des propriêtaithes auve des noms Jèrriais tchi sont à prendre avantage du manque dé louages et d'maîsons pour faithe d'ité.
J'vai qu'la renchiéthe continnue dans l'Île et tch'i' faut payi chi pour le tchèrbon. J'avais dêjà r'mèrtchi qu'l'êlectricité couôtait à bein près l'doubl'ye quand j'tais en Jèrri l'té passé. En pâssant, i' m'veint à l'idée qu'Napolèon éthait 'té justifié, s'il avait 'té vivant et en Jèrri, d'changi l'calendriyi à Pluviose tch'tait du 20 d'Janvyi au 20 d'Févri quand il inventit san calendriyi rèpublicain) pour les trais ou quat' mais d'plyie dé ch't té là!
Mais pour èrvénîn à la renchiéthe. J'vai qué l'respecté Connêtabl'ye d'St Ouën lus disait dans L's Etats qué trais grands êleveux d'bêtes dé la pâraisse ont vendu lus vaques. I' n'dait pon en rester fort à ch't heu, dans la pâraisse. J'n'en sis pon êtonné quand j'vai dans la gâzette qué l'fain couôte nénante louis l'tonné, et qu'ch'est les propriêtaithes dé j'vaux tch'en acatent la grand partie. Eh bein, i' faudra nouos mettre à mangi du j'va à la pliaiche dé boeu - chein tchi né s'sait pon eune punnition pour mé, car j'en ai mangi pas mal dans man temps et j'peux dithe que ch'est d'bouanne viande. Mais ché s'sait aut' affaithe s'i' fallait s'mett' à traithe les junments pour rempliaichi l'lait des vaques. I' faudrait au mains s'assiéthe sus un bathi à la pliaiche d'eune scabelle pour aveindre comme i' faut!
Lé portrait du Sieur Stephen Venables mé rappel qué j'tais en Jèrri en 1951 quand la louai sus l'asseûthance fut passée dans L's Êtats et tch'i' fut quâsi assonmé par la foule dans lé People's Park lé preunmyi d'septembre. Et j'tais dans la gal'lie publyique dé la Chambre quand l'Député J.J. L'Mèrquand opposit l'pâssage dé la louai si couothageusement. Eh bein, ch'est histouaithe du temps pâssé à ch't heu, et j'souhaite bouanne chance et bouanne santé au Sieur Venables, et bein d's années à l'av'nîn pour èrchéver sa pension. Quant à la tchestchion méthitouaithe dé la pension pour eun p'tit pays comme Jèrri, ch'est eune affaithe d'opinnion tchi né s'sa janmais eunaninme. Mème ichîn en Améthique, certains sont d'oppinnion qué si la souscription qu'les gens paient au gouvèrnément pour nouot' pension d'sécurité sociale avait 'té payie à eune bouanne compangnie ndépendente d'asseûthance, ou nouos paiethait eune bein miyeuthe pension, car la bureaucratie gouvèrnémentale est tréjous trop nombreuse et sans ambition pour opéther êconomiquement. J'sai bein quand meme qué les fèrmièrs ont fort à faithe pour payi les contributions pour lus travailleurs dans les mauvaises saisons, sustout quand i' faut tch'i' paient la contribution d'l'îndividu étout pour lé tenter d'travailli, car les gages sont si hauts à ch't heu qu'l'ouvriyi n'a pus bésoin dé s'lâsser pour sé garder en vie!
George d'La Forge
Viyiz étout: