Les Pages Jèrriaises

Choses et autres

Trenton, Michigan,
U.S.A.

Lé 24 dé mai, 1975.

Moussieu l'Rédacteu,

Tch'est tch'i' faut faithe pour pérsuader la gâzette dé donner lus vrais noms ès pliaiches et rues Jèrriaises? J'tais d's'appointé d'vaie, dans la gâzette du dgix d'avri, qué dans l'articl'ye dé Sue Le Ruez oulle appelle La Mathe au Seigneu “St. Ouen's Pond” et qu'ou dit “Five Mile Road” pour La Grand' Route des Mielles. Dépis qu' oulle admet dans s'n articl'ye qu' ou connait l'vraie nom d'La Mathe, pourtchi faithe sèrvi l'mênom dé “St. Ouen's Pond” comme titre? Auve san bouan vièr nom Jèrriais dé Le Ruez où dév'thait saver mus!

En pâlant des mielles, j'liêsais dans ieune des aut' gâzettes qué les gens à j'va sont à les dêtruithe. Tchi vie d'nouos jours! L's autorités veinnent dé prendre les m'suthes nécessaithes - et v'la tchi dait aver couôté chi - pour empêchi les motos d'les sacagi. À ch't heu ch'est la j'vaûch'chie tchi s'abûse à les galvaûder et l's avraûner. I' n'y a pon mouoyen, les gens d'à ch't heu n'pathaîssent aver autchun sens d'responsabilité ni d'ordgi au sujet d'la natuthe. Pourtchi qu' les j'vaûcheurs né vont pon sus les courses quand i' veulent galoper? Pouorre vièr Jèrri! Auve maîsons, motors, j'vaûch'chie, tourisme et mouvements souô-disant démocratiques, i' finnitha par êt' engliouti par l'esprit destructif, offrun et finnancyi dé nouot' époque. I' faut féliciter l's autorités pour aver r'fûsé d'en sacrifier eune aut' chentaine dé vrégies, d'ches belles mielles, pour agrandi l'êtendue du club dé golfe.

Et la police a fait bein d'poursuivre lé villais tch'eut l'affront d'dêchérgi ses débris dans les clios d'Mêssieux Douard À'court et Clarence Rault. Faut-i' en aver d'l'affront, pour faithe d'ité? Et i' faut féliciter l'Chent'nyi Dennis Èrnon pour aver dêcouvèrt lé coupabl'ye.

J'sis bein content d'vaie qué l'Député Riley s'est întérêssi à êcrithe eune articl'ye entouorre la tchestchion d'payi les Membres d's Êtats. Oulle est bein à propos, sén articl'ye, et vaut la peine dé liéthe car i' nouos dit, auve raison, qué la grande împortance est d'aver des membres dé bouanne qualité dans La Chambre Législative et qué l'paiement d'un salaithe n'est autcheune garantie d'capacité ni d'qualité. À m'n idée, l'système honorifique d'à ch't heu et d'vièr temps vaut la peine dé continnuer. Lé fait qué les membres actuels ont fait bein dans la vie commèrciale et professionnelle est garantie tch'il' ont des p'tits boudîns dans la tête. Et i' n'faut pon oublier qué l'mot “démocratique” qu'un tas d'badlagoules aiment à prononcer à d'difféthencés interprétations dans difféthents groupes dé pèrsonnes. Par exempl'ye, les Russes et Chinnouais appellent lus gouvèrnéments “démocratiques” et les sŷndicats des travailleurs s'appellent sé méme étout, et où'est qu' nou peut trouver autcheune chose pus autocratique qué ieux? L's unions lus prouvent autocratiques du moment tch'i' faut sèrvi la m'niche dé grève en preunmié lieu quand i' veulent tchiquechose à la pliaiche dé la faithe sèrvi quand touos aut' procédés n'ont pon rêussi à rêsoudre lé problème. Et i' n'ont autcheune considéthâtion pour lé publyi.

La baithie pathaît en gângni dans l'île. La gâzette nouos annonce qué chent dgiex-s'neu motoristes fûdrent présentés d'vant La P'tite Cour duthant l'preunmié quartchi d'l'année pour aver cachi des motos quand il' 'taient souos l'înfluence dé la litcheu, quand tch'i' n'y en eut qu' vîngt-deux dans l'preunmié quartchi dé l'année pâssée. Ch'n'est-i' pon abominabl'ye qué l's ivrouangnés d'adoptent pon l'prîncipe qué s'i' baivent i' n'faut pon cachi, et qu' s'i' cachent i' n'faut pon baithe? Né v'la un prîncipe tchi vaut la peine d'adopter comme diton pour lé mett' parmi nouos bouans vièrs ditons!

J'ai souvent admithé les grand' hautes muthâles qué nou vait d'bord-t-en autre en Jèrri, et j'mé sis d'mandé bein des fais combein tch'i' daivent aver couôté à bâti quand j'ai pensé à chein tchi m'a couôté pour lé mio d'machonn'nie qu' j'ai au Ménage. I' n'faut pon oublier, sans doute, qué ches hautes muthâles ont 'té bâties dans l'temps qu' les gages 'taient en rapport auve lé bas prix du matèriel et l'couôtement d'la vie du temps d'nouos vièrs. Mais l'pâssage du temps à s'n êffet sus les muthâles comme lus l's êvènements d'la vie, et quand i' s'écroûlent et tchaient sus les maîsons, comme nou l'vait sus l'portrait dans la gâzette dans “Undercliffe Road” nou peut dithe “Tchi pataflias!” La fanmil'ye dans la maîson eut la chance qué l'lief né donnîsse pon souos l'paids d'la machonn'nie tchi tchit d'ssus.

En pâlant d'l'abattage dé machonn'nie, v'la tchi m'fait frémi d'vaie l'portrait d'un coupl'ye d'hommes au haut d'la cheunm'née d'chent vîngt pids tchi s'en vont abattre, brique par brique, dans l'bel du “Jersey Gas Company”. À m'n idée, i' faut du couôthage pour grîmper là haut, sans pâler d'y travailli.

George d'La Forge
 

Viyiz étout:

 

Les Pages Jèrriaises