Moussieu l'Editeu
La Merrienne, tch'a tréjous tait intérêssie dans la politique, me d'mandit hier au sé pourtchi qu'personne ne pathaissait aimé les Communistes. "Tchêque'ils ont fait don chais gens-là qu'nou lûs fiche des tomates dans la cabiche et qu'nou câsse lûs f'nêtres?" ou s'fit.
"Eh ben," j'l'y raiponnit, "chais d'drôles de gâs, les Communistes. Sans doute y'en a parmi yeux tch'y sont pûs bêtes que mauvais, mais accordant à mé, n'y'en a pas pour chi. Jêrri n'a pas besoin d'chonna."
"Mais tchêsqu'y veulent faithe?" ou d'mandit.
"Y veulent en faithe de toutes les sortes," j'l'y dit. "A qu'menchi y voudraient aboli l's'Etats."
"Eh ben, mais ch'ne s'sait p't'être pas une mauvaise chose," s'fit la Merrienne. "Tchi bein qui font, l's'Etats, peux-tu m'dithe? Y'en a hardi tch'y craient qu'si nou l's'enviyait a lûs prom'né pour tchiques années l'île n'en s'sait pas d'pièthe."
"Y n'faut pas pâslé d'mème," j'l'y dit. "Il est vrai tch'y passent des louais qu'nou n'comprend pas, et tch'y dêpensend hardi d'sous mal à propos, mais y'a ocquo d'solides balloqies dans la Chambre et d'bouans viers Jèrriais."
"Heutheusement," ou dit, "mais continue pour les Communistes. Ont-y d'autres idées?"
"Tout plien," j'l'y dit. "S'ils avaient lûs volonté, n'y'éthait ni chapelles, ni églyises. Tout chonna s'sait aboli et y n'y'éthait autchune réligion."
"Oh, les fripons!"
"N'y'éthait pas d'mathiages."
"Bon! A chu compte-là che s'sait bétôt la fin du monde."
"Oh, grand doûx, nouffé," j'l'y dit. "Tu n'comprends pas. Y'éthait pûs d'mousses que jamais."
"Sans mathiage?"
"Ben seûx."
"Mais tchi disgrace! Arrête tch'ils aient une autre réunion. Si je n's'y pas là à capuchi d'sûs ôv man vier paraplyie man nom n'est pas Merrienne. J'lûs montréthai si j'ai ocquo d'la forche dans les bras."
"Né t'gêne pas," j'l'y dit. "Après tout lé parti n'est pas ben fort, car n'y'a qu'trente-trais membres."
"Ch'est trente-trais d'trop," ou dit, "mais y'en éthait-t'y par chance yun ou deux à Saint-Ou? Dis-mé, j't'en prie, ouêstque y d'meuthent que j'aille vos les sécoué."
"J'n'en connais pas," j'ly dit, "mais si j'en dêcouvre yun tu l'séthas, et j'voudrai être là pour te vais l'camaillyi. Mais ach'teu j'n'ai pas fini. Si j'avions un gouvernment Communiste, toute propiêté appartchendrait à l'Etat. chutte ferme ichin, par exemplye, ne s'sait pûs à nous. Et hommes et femmes éthaient à travaillyi dimanche comme sûs s'maine. Quant ès mousses, un jeunbe couplye tch'y n'en produithaient pas au mains yun touos l's'ans s'trouv'thaient ben vite d'vant la cour pour explitchi tchêsque chonna voulait dithe. Epis, ben seûx l's'avers d'veindraient la propriêté du Gouvernment. Ch'est d'même tch'y font en Russie."
La Merrienne considéthit pour tchiques instants, épis, "Mais man Ph'lip, ch'est presque incriyablye," ou dit à la fin. "Tchêsque éthait jamais creu qu'nous éthait yeu ditet dans not' p'tit Jèrri? Hélas! ouêsque j'allons?"
Et savous ben, Moussieu, q'ma pouôre bouonnefemme n'en dormit pas d'niet. J'm'en vais d'mandé au Recteur de v'nin la vais pour la rasseûthé.
Ph'lip
21/8/1948
Viyiz étout: