Qu' est-ch' que l'bounheur? De vrai, je n' en sais mie,
D'en par ichin, allant piann' piann' man qu'min,
Tout douochement, sans grand' jouaie ni chagrin,
J'ai traverse la maintié de ma vie,
Et si l'bounheur sus ma route a passé
Je n'l'ai pon veu, ou i'm'a écappé.

Tout l'monde en d'vis'nt, mais i'n'sont pas d'accord;
Pour un fliocquet, Bounheur veurt dith' Richesse.
Et pour y-aveindre i' se torment'nt sans cesse;
I'm'semblle à mai que ches gens-là ont tort;
Mais pour êt'e seux, et de peux de m'tromper,
Je s'rais ben aise d'aver chance d'êprouver.

D'autres poussés d'un pus noblle ambition,
Cherchant l'bounheur mont'nt ès grand's dignités,
Au haut d'l'ètchell' quand i sont arrivés,
I' trouv'nt, d'amors, que l'bounheur n'y est pon!
V'la chain qui s'dit, mais je n's'rais pas marri,
D'y-aller mai-mêm' pour pouver en jugi.

Nou m'a conté que Bounheur ch'est Amour!
J'ai oui aitout que nou peut y-êt'e pinchi;
Chla s'pouorrait ben, et j'n'en s'rais pas ravi!
Mais ov le contre, i' dait y aver du pour,
Et si fillette ov coeur fidèle et tendre,
Voulait m'montrer, je s'rais tenté d'apprendre!

LAELIUS.

Tch'est-che qué l'bonheur? Dé vrai, jé n'en sais mie,
d'en par ichîn, allant pianne-pianne man c'mîn,
tout douochement, sans grande jouaie ni chagrîn,
j'ai travèrsé la maîntchi dé ma vie,
et si l'bonheu sus ma route a pâssé,
jé n'l'ai pon veu, ou i' m'a êcappé.

Tout l'monde en d'visent, mais i' n'sont pas d'accord;
pour un fliotchet, Bonheu veurt dithe Richesse.
Et pour y'aveindre i' sé tormentent sans cêsse;
i' m'sembl'ye à mé qué ches gens-là ont tort;
mais pour êt' seux, et dé peux dé m'tromper,
jé s'sais bein aise d'aver chance d'êprouver.

D'aut's poussés d'un pus nobl'ye ambition,
chèrchant l'bonheu montent ès grandes dîngnités,
au haut d'l'êtchelle quand i' sont arrivés,
I' trouvent, d'amors, qué l'bonheu n'y'est pon!
V'là chein qui s'dit, mais jé n's'sais pas mârri,
d'y'aller mé-même pouor pouver en jugi.

Nou m'a conté qué Bonheu ch'est Amour!
J'ai ouï étout qué nou peut y'êt' pînchi;
ch'la s'pouôrrait bein, et j'n'en s'sais pas ravi!
Mais auve lé contre, i' dait y'aver du pouor,
et si filliette auve tchoeu fidèle et tendre,
voulait m'mouontrer, jé s'sais tenté d'apprendre!