Viyant que j'avais une suée d'fraid
Viyant que j'avais une suée d'fraid, pouor être à la mode couomme touot l'monde, j'pense, l'Sieur Caouain s'ameni l'autre sé avec une p'tite bouteille à médecine et s'fit: Marie, n'v'la de tchi bon qui s'en va te r'mettre allright et te guerir. Y faut en mettre deux ou trais tchuillerèes à thée dans une bollée de lait caud, avaler l'tout et aller te couocher et demain au matin il restera pus d'iau pouor la fontaine que tu as au but du nez!
Quand j'voulu saver tchi sorte de stuff que chunna était et que j'eut hallé l'bouchon j'railli en tchès bas. Tchi saleté que chunna, n'v'la qui sent couomme de vieilles cauches; ch'est d'la poison et pouor seur que j's'rais guérie à touot jamais si j'en prenais un larmin!
Y réponnit que ch'n'tait pon d'la poison et y s'mint à baithe le tout ly même, s'faisant qu'en se caufant n'v'la qui m'recaufferait p't'être! Ch'est du rhum, qui s'fit, et rein de dithèt pouor se guérir d'un fraid. Et ly, qui n'tait pon malade, prit chu r'mède pouor me guérir! a chein qui dit.
* * *
Pouor seur j'ai été ès ècoutes dans la paraisse à mon biau cliochi et d'pis deux ou trais s'maines.
J'en ai oui de bien des sortes car l'affaithe est bein mêlée et il y en a de marris.
J'tais au meeting et quand Phlip du Caté, l'nouviau boss de chutte paraisse, tapi un coup de poing sus la table et en fit tressauter la lampe qui n'eut que de tchès, j'pensi que ieun de ceux qui était touot près de chutte table v'nait d'en attraper pouor ses sous on ses d'vis et y pouvait mettre son moucheux de pouchette par dessus!
Il y en a qui voudraient saver pouortchi qu'ieun des grands de chutte paraisse n'signi pon l'papi de nomination. Mé j'peux lus répondre que ch'est viyant qu'nous n'ly d'mandi pon!
Ch'est qu'il y en a ieut de d'vis dans chutte paraisse.
Enfin, l'affaithe ès settlée et j'sais bein que Phlip n'aura pon besoin de secraitaithe pouor l'y aidji a remplir la job et ch'n'est pon ly qui s'laissera m'ner par l'but du nez.
Pouor Député l'sien d'la Commune est candidat. Il y en a une djingue qui voudraient l'opposer et j'ai oui pasler qu'nous aller d'mander à Charles - pon l'chantgni, qui n'en veur pon - et si veur il y aura une bordée d'election.
Fouai de Marie Hibou, si l'sien d'la Commune est Député et qu'Edwin est candidat pouor chantgni il y aura élection.
Pouor annièth j'n'en dirai pon pus long mais j'reste ès écoutes.
* * *
La bague d'engagement était un mio trop p'tite, mais ch'n'tait pon une Valentine quoiqu'oulle fut donnée l'autre Jeudi l'jour de la St. Valentin.
Pouor seur, je n'serai pas invitèe ès neuches viyant que j'ai trop de becque mais j'espèthe que d'ichin chu grand jour la strike des dockers s'ra finie car si nous douonne un miot de gache à touos les siens qui paslent de chut évènement y faudra faithe v'nir une cargaison de corinthes et d'paste d'amendes.
Quant à mé j'lus souhaite jouaie et prospérité.
Marie Hibou
1924
Viyiz étout: